Héraðsdómur Reykjavíkur hefur dæmt íslenska ríkið til að greiða manni eina milljón króna í miskabætur vegna ámælisverðra vinnubragða og óeðlilegs dráttar við rannsókn lögreglu á líkamsárás sem hann varð fyrir árið 2020.
Maðurinn krafðist þess að skaðabótaskylda íslenska ríkisins yrði viðurkennd vegna tjóns sem hann hlaut af mistökum sem urðu við rannsókn lögreglu og aðgerðir og aðkomu ákæruvaldsins að málinu. Ríkið var hins vegar sýknað af kröfu mannsins um að bera ábyrgð á því líkamstjóni sem hann hlaut í árásinni.
Varð fyrir líkamsárás 2020
Maðurinn varð fyrir árás á skólalóð í Reykjavík árið 2020 þegar hann var á göngu með hund sinn. Hann tók eftir þremur bílum sem lagt var fyrir framan knattspyrnuvöll sem stóð við skólabyggingu. Maðurinn ákvað að taka upp síma sinn og mynda bílana og stuttu síðar varð hann fyrir árás eftir að einstaklingur gekk að honum og sagði honum að hætta að taka myndir.
Maðurinn taldi að alls hefðu á bilinu þrír til fjórir drengir veist að sér og hlaut meðal annars rifbeinsbrot, áverka á öxl og mjóbaki auk áfallastreituröskunar.
Við meðferð málsins kom fram að rannsókn lögreglu hefði tafist verulega.
Samkvæmt niðurstöðu ríkissaksóknara lá rannsókn meðal annars niðri mánuðum saman, mikilvægar skýrslutökur fóru fram með símtölum í stað formlegra yfirheyrslna og rannsakendur brugðust skyldum sínum til að upplýsa málið nægilega vel.
Ríkissaksóknari taldi rannsóknina hvorki hafa verið nægilega ítarlega né framkvæmda innan hæfilegs tíma.
Ámælisverð vinnubrögð lögreglu
Maðurinn byggði á því að slæm rannsókn hefði orðið til þess að aðeins einn meintur árásarmaður var ákærður og að hann hefði þar með misst af möguleikum til að fá fullar bætur vegna tjóns síns.
Dómurinn féllst þó ekki á að sýnt hefði verið fram á orsakasamband milli annmarkanna á rannsókninni og þess tjóns sem maðurinn varð fyrir í árásinni. Ekki væri hægt að fullyrða að niðurstaða sakamálsins hefði orðið önnur þótt rannsóknin hefði verið betur framkvæmd.
Því var ríkið sýknað af kröfu um viðurkenningu á skaðabótaskyldu vegna líkamstjónsins sjálfs.
Hins vegar taldi héraðsdómur að að hinn mikli dráttur og vinnubrögð lögreglu hefðu falið í sér ólögmæta meingerð gagnvart brotaþolanum og verið brot á friði hans og æru. Fyrir það var ríkið dæmt til að greiða honum eina milljón króna í miskabætur auk tveggja milljóna króna í málskostnað.
Í dóminum segir að starfshættir lögreglu í málinu hafi sýnt „skort á skipulagi, stjórnunarvanda og skeytingarleysi gagnvart mikilvægum hagsmunum stefnanda og almennings“ og að slíkt sé til þess fallið að grafa undan trausti á lögreglu.
