Reykjavík Geothermal, í samstarfi við stjórnvöld og orkufyrirtæki á Tenerife, hefur hafið jarðhitaboranir til raforkuframleiðslu á Kanaríeyjum.
Fram kemur í tilkynningu frá félaginu að verkefnið marki stór tímamót í vegferð eyjanna í átt að hreinni, öruggari og staðbundinni orkuframleiðslu.
Tekið er fram, að rannsóknarholan, sem nú er verið að bora, sé staðsett í suðurhlíðum Teide-eldfjallsins og sé sú fyrsta af nokkrum fyrirhuguðum rannsóknarholum sem ætlað sé að meta jarðhitamöguleika eyjanna. Holunum, sem muni ná niður á um 2.500–3.000 metra dýpi, sé ætlað að staðfesta hvort auðlindin henti til langtímaframleiðslu á endurnýjanlegri orku.
Þá kemur fram að Reykjavík Geothermal sé leiðandi eigandi og þróunaraðili verkefnisins ásamt spænskum samstarfsaðilum og opinberum aðilum á Tenerife og komi að uppbyggingu verkefnisins allt frá rannsóknum og fjármögnun til þróunar og framtíðarreksturs.
Meðal samstarfsaðila Reykjavík Geothermal er spænska fyrirtækið DISA sem er eitt stærsta fyrirtæki eyjanna og stærsti fjárfestir í hreinni orku Kanaríeyja.
Náðu sögulegum áfanga í maí
Bent er á að sögulegur áfangi í verkefninu hafi náðst núna um miðjan maí þegar boranir hófust á fyrstu rannsóknarholunni sem staðsett sé á suðurhluta Tenerife.
„Verkefnið byggir á margra ára undirbúningsvinnu samstarfsaðilanna, sem tryggðu sér rannsóknarleyfi frá spænskum yfirvöldum á Tenerife og nágrannaeyjunni La Palma í opinberum útboðum 2023. Gríðarleg vinna er að baki í jarðvísindarannsóknum og hinum ýmsu leyfisferlum, grenndarkynningum, skipulagsmálum og vinnu með hagaðilum. Núverandi lagaumhverfi gerir það vandasamt að selja þá orku sem verkefnið gæti framleitt, vegna sérreglna sem skekkja orkumarkaðinn á Kanaríeyjum með því að niðurgreiða orkuframleiðslu með olíu og koma þannig í veg fyrir að ódýrari og hreinni orka komist að.
Þróunaraðilar verkefnisins treysta þó á að spænsk stjórnvöld muni skapa skilyrði fyrir því að hreinni, hagkvæmari og sjálfbærari orkulausnir fái að ryðja sér til rúms á orkukerfi eyjanna,“ segir í tilkynningunni.
Enn fremur segir að verkefnið hafi jafnframt hlotið öflugan stuðning frá Evrópusambandinu og spænskum stjórnvöldum, sem hafi veitt allt að 58 milljónir evra í styrki til rannsóknarborana á allt að þremur svæðum samstarfsaðilanna á Tenerife og einu svæði á nágrannaeyjunni La Palma.
Skref í átt að auknu orkuöryggi
„Verkefnið markar mikilvægt skref í átt að auknu orkuöryggi og orkusjálfstæði Kanaríeyja. Í dag byggir yfir 80% raforkuframleiðslu á Kanaríeyjum á innfluttri olíu, sem leiðir af sér orkukostnað sem er allt að sex sinnum hærri en á Íslandi og mikla kolefnislosun,“ segir í tilkynningunni.
Þá er bent á að á Tenerife, sem er um 2% af stærð Íslands, sé þegar mikið landsvæði helgað vind- og sólarorkuverkefnum, sem taki að jafnaði um tíu sinnum meira pláss en jarðhitaverkefni. Því hafi yfirvöld á eyjunni gefið út að ekki verði lagst í fleiri stóra vind- og sólarorkugarða að svo stöddu.
„Ekkert vatnsafl er að hafa og litlar grynningar sem mætti nýta fyrir vindorkugarða á hafi, svo jarðhitinn gæti verið eini raunhæfi möguleiki eyjanna til að tryggja sjálfbæra framtíð með orkuskiptum í raforkuframleiðslu,“ segir enn fremur í tilkynningunni.
