Pólsk kona sem dvalið hefur á Íslandi í heilt ár en skildi hundinn sinn einan eftir heima gæti átt þungan fangelsisdóm yfir höfði sér þegar hún kemur heim. Dýrasamtökum blöskraði hvernig komið var fram við dýrið.
Konan er frá borginni Szezecin nálægt þýsku landamærunum og greint er frá málinu í staðarmiðlum þar.
Konan fór til Íslands fyrir ári síðan til að vinna en skildi hundinn sinn eftir einan heima. Málið er nú komið á borð lögreglunnar og gæti konan átt allt að þriggja ára fangelsisdóm yfir höfði sér.
Í miðlinum Szezecin segir að konan hafi sent 10 pólsk zloty heim í hverjum mánuði fyrir fólk til þess að sjá um hundinn. Það gera um 340 íslenskar krónur. Þetta voru meðal annars ung stúlka og flóttamaður frá Úkraínu.
Eins og gefur að skilja dugaði þessi upphæð alls ekki til þess að halda uppi hundinum, sem er nokkuð stór blendingshundur. Fyrir utan að vera einsamall innan veggja heimilisins í heilt ár og fá lítið að fara út þá var aðgangur hans að mat og vatni mjög tilviljanakenndur.
Skítur og hland út um allt
Dýraverndunarsamtök í borginni fengu ábendingu um málið frá ónefndum aðila og blöskraði þegar þau sáu aðstæðurnar sem hundurinn bjó við. Var málið sent til dýraverndunarstofnunarinnar TOZ sem tilkynnti málið svo til lögreglu.
Útsendarar TOZ létu til skarar skríða þann 14. apríl síðastliðinn. Var íbúðin í mikilli óreiðu og augljóst að um vanrækslu dýrsins var að ræða. Hundaskítur og hland var út um allt og bæði matar og vatnsskálarnar tómar. Var hundurinn fjarlægður af heimilinu og komið í skjól.
Einn maður fannst á staðnum sem ætlaði að sinna hundinum. Hann sagðist hafa borgað sjálfur fyrir mat handa hundinum þar sem framlögin frá eigandanum á Íslandi dugðu ekki. Sú upphæð hafi varla dugað til þess að fæða svo stóran hund í einn dag. Sá maður var hins vegar atvinnulaus og átti sjálfur ekki djúpa vasa til fjármagna uppihaldið.
Veit nákvæmlega hvernig staðan er
Að sögn TOZ þá veit eigandinn á Íslandi nákvæmlega hvernig staðan er með hundinn og það ásigkomulag sem hann er í. Hún hafi hins vegar ekkert gert til þess að bæta ástandið. Þegar TOZ hafi haft samband við hana hafi hún furðað sig á að verið væri að taka dýrið af henni. Síðan hætti hún að svara skilaboðum.
Hundurinn er nú í dýraathvarfi í borginni. Að sögn TOZ þarf hann aðhlynningu, að undirgangast læknisrannsóknir og læra að treysta fólki á nýjan leik.
Málið hefur verið kært til lögreglu en að yfirgefa dýr er alvarlegur glæpur í Póllandi. Getur slík framkoma varðað allt að þriggja ára fangelsi og jafn vel fimm ára ef vanræksla og ofbeldi er mjög mikið.
Engin skrímsli
TOZ greindu frá málinu á sinni Facebook síðu og fjöldi fólks hefur brugðist við í athugasemdum.
„Ég vona að hún fá þyngstu refsingu sem hægt er fyrir það sem hún gerði þessum hundi,“ segir einn í athugasemdum. „Þangað til refsað er fyrir svona athæfi þá mun ekkert breytast í þessu landi. Þess vegna hjálpa ég frekar dýrum en fólki. Ég vorkenni þessum hundi. Það eru engin skrímsli til í heiminum, aðeins fólk.“
