Sigrún Ágústsdóttir, forstjóri Náttúruverndarstofnunar, segir aukna eftirspurn, truflanir og óhöpp vera ástæðu þess að stjórnsýsluframkvæmd fyrir leyfisveitingar á flugi dróna á friðlýstum svæðum hafi verið breytt.
Óánægja hefur ríkt meðal íslenskra atvinnuljósmyndara vegna breytinga á framkvæmdinni en þeir telja hana gera drónaljósmyndun erfiðara um vik á miklum fjölda verndaðra og friðlýstra svæða í umsjá Náttúruverndarstofnunar.
Viðbrögð við aukinni aðsókn
Sigrún segir að ætlunin hafi ekki verið að gera út af við drónaljósmyndun og að ekki sé um að ræða um fortakslaust bann við notkun dróna heldur sé aðeins verið að bregðast við aukinni aðsókn á svæðin. Hún segir alveg ljóst að ljósmyndarar muni áfram fá að stunda sína iðju samkvæmt nýrri framkvæmd.
„Eftirspurnin fyrir því að fljúga dróna í afþreyingarskyni hefur aukist verulega á undanförnum árum og það ber á því að gestir kvarti yfir truflun og því þarf að reyna finna sameiginlega lendingu fyrir alla aðila sem vilja njóta náttúrunnar á þessum svæðum.“
„Að því er ég best veit höfum við þó ekki verið að synja miklum fjölda umsókna um drónaflug, en það er ekki farið í svona breytingar nema það sé tilefni til. Óskir um drónaflug hafa farið vaxandi og þess vegna byrjar þetta verkefni, en við vinnum eftir reglum sem þegar er búið að setja í friðlýsingarskilmálum og stjórnunar- og verndaráætlunum svæðanna“ segir Sigrún í samtali við mbl.is.
Verndun geti byggst á ólíkum forsendum
Hún segir að mörgu að huga þegar komi að því að passa upp á friðlýst svæði og því séu reglur um drónaflug oft ólíkar eftir svæðum þar sem friðun þeirra byggi á ólíkum forsendum.
„Markmiðin með friðlýsingunum eru svolítið breytileg og gestakomur eru mjög misjafnar. Stundum er verið að vernda lífríki, stundum er verið að vernda kyrrðarupplifun og svo eru aðrir staðir mjög fjölsóttir þar sem þarf að taka tillit til mannfjölda og flugi yfir hann,“ segir Sigrún.
„Sömu svæðin eru því eftirsótt út frá svo mörgum sjónarhornum.“
Vilja taka upp samtal
Sigrún segir ljósmyndun á íslenskri náttúru afar mikilvæga, bæði til að skrásetja náttúruna fyrir komandi kynslóðir en ekki síður til að auka hróður Íslands út á við og að Náttúruverndarstofnun sýni starfi ljósmyndara mikinn skilning.
„Við skiljum að breytt framkvæmd á leyfisveitingum hafi valdið óánægju en línudansinn okkar þarna á milli að búa til kerfi sem allir aðilar geta sætt sig við, og í ljósi þess að ljósmyndarar hafa viðrað óánægju sýna með þessar breytingar, þá segir það okkur að við höfum ekki enn fundið rétta punktinn.“ segir Sigrún.
Hún segir að stofnunin sýni því sjónarmiðum ljósmyndara mikinn skilning og að stefnt sé að því að taka upp frekara samtal við Ljósmyndarafélag Íslands sem fyrst til að reyna koma til móts við þau sjónarmið sem ljósmyndarar hafa viðrað.
„Við viljum taka samtal við ljósmyndara og við höfum ekki sett endapunktinn við þetta, og vonumst til að geta komist að niðurstöðu sem allir geta sætt sig við,“ segir Sigrún að lokum.
