Landsframleiðsla á hvern landsmann hefur staðið í stað síðustu sjö ár.
„Það merkir það að okkur er ekki að takast að bæta lífskjör með viðlíka hraða og við gerðum hérna áður fyrr,“ segir Ingólfur Bender, aðalhagfræðingur Samtaka iðnaðarins. Fjölmargir þættir útskýri þetta.
Í nýrri greiningu SI er farið yfir þessa þætti og með hvaða hætti sé hugsanlegt að snúa þróuninni við.
„Við bendum sérstaklega á að þeir þættir sem skýra ólíka samkeppnisstöðu og ólíka þróun í landsframleiðslu á mann milli landa varða mannauð, nýsköpun, starfsumhverfi, innviði og orku- og umhverfismál,“ segir Ingólfur.
Hugsanlega megi snúa þróuninni við með því að bæta stöðu Íslands á þessum sviðum.
Þess má þó geta að síðustu ár hafa verkalýðsfélög samið um styttri vinnuviku sem gæti að einhverju leyti skýrt minni vöxt en árin áður.
Vilja vinna upp innviðaskuld
Ingólfur nefnir að tryggja þurfi stöðugt starfsumhverfi, meðal annars með því að minnka verðbólgu. Þá þurfi að auka iðn- og verkmenntun og tryggja rannsóknir og þróunarstarf.
Samtökin vilja einnig auka uppbyggingu íbúðahúsnæðis og vinna upp innviðaskuld síðustu ára.
„Samgöngu-, orku- og fjarskiptainnviðir og opinberar byggingar og svo framvegis. Þarna höfum við ekki staðið okkur nægilega vel. Það er að draga úr framleiðni í hagkerfinu að við séum ekki að byggja upp innviði og ná að viðhalda þeim eins og við þyrftum að gera,“ segir Ingólfur.
