Nýr meirihluti í Reykjavík segist geta náð breiðri sátt og stefnir að því að auka traust borgarbúa, láta af stjórnlyndi og ráðast í víðtækar stjórnkerfisbreytingar. Þetta kom fram í viðtali við oddvitana Hildi Björnsdóttur, Björgu Magnúsdóttur og Einar Þorsteinsson í Kastljósi í kvöld.
Þrátt fyrir að Sjálfstæðisflokkur og Miðflokkur hafi gert gott mót í sveitarstjórnarkosningunum og getað myndað tveggja flokka meirihluta ákvað Hildur að fara aðra leið. Hún segist fyrst hafa reynt að mynda fjögurra flokka meirihluta Sjálfstæðisflokks, Miðflokks, Viðreisnar og Framsóknar, en þegar það gekk ekki eftir hafi valið staðið á milli tveggja kosta.
„Ég valdi bara þann kost sem ég taldi bestan fyrir Reykjavík. Þetta er sá kostur sem er með meirihluta atkvæða á bakvið sig,“ sagði Hildur og bætti við að hún teldi óskynsamlegt að sveifla borginni alveg í hina áttina.
Hún benti á að flokkarnir þrír þekkist vel eftir að hafa starfað saman í minnihluta síðasta eina og hálfa árið og að mikið traust ríki á milli oddvitanna.
Svara ákalli um breytingar
Oddvitarnir telja sig mæta skýru ákalli kjósenda um breytingar. Björg Magnúsdóttir, oddviti Viðreisnar, sagði sinn lista skipaðan fólki sem væri nýtt í pólitík en hefði rekið sig á kerfið með ýmsum hætti í sínu daglega lífi. „Okkur þyrsti í breytingar og það var uppleggið í okkar kosningabaráttu,“ sagði Björg.
Einar Þorsteinsson, oddviti Framsóknarflokksins, sagði að ákvörðun flokksins um að sprengja fyrri meirihluta hefði verið rétt og að kjósendur hefðu verðlaunað hann fyrir að standa með sannfæringu sinni. Hann viðurkenndi að Framsókn hefði tapað miklu fylgi frá metkosningunum 2022 en sagðist feginn og þakklátur fyrir að halda áfram að vinna fyrir borgarbúa.
Einar sagðist vonast eftir samheldnari borgarstjórn þar sem dregið yrði úr „tilgerðarpólitík“ og ágreiningi og horft til þess að allir 23 borgarfulltrúarnir séu þarna til að þjóna almenningi.
Endurskoða samgöngusáttmálann
Miklar umræður urðu um samgöngumál en í nýjum málefnasáttmála er boðuð endurskoðun á samgöngusáttmálanum. Björg tók fram að Viðreisn liti enn á sáttmálann sem lykilplagg fyrir framtíðina en leggja þurfi áherslu á samtal við nágrannasveitarfélögin og ríkið til að koma í veg fyrir framkvæmdastopp.
Hildur lýsti yfir áhyggjum af fjármögnun sáttmálans eins og hann leggur sig og lýsti yfir andstöðu við umferðar- og veggjöld og talaði fyrir því að flýta Miklubrautargöngum.
„Þau eru núna aftast í forgangsröðun þessa sáttmála. Það eru tækifæri til að taka þau út úr sáttmálanum og setja í einkaframkvæmd. Þar yrði hófleg gjaldtaka en þá þarf að tryggja að vegfarendur hafi annan kost, að fara gjaldfrjálsa leið. Við þurfum að sjá hvort það sé hægt að taka einhver verkefni út til að flýta þeim af því við viljum ekki framkvæmdastopp.“
Hagræðing og niðurskurður í vændum
Spurð út í hvort Reykvíkingar mættu búast við uppsagnarsumri í ljósi loforða um hagræðingu sagði Hildur að kjósendur hefðu gefið skýrt umboð til niðurskurðar í rekstri borgarinnar.
„Allir þessir flokkar töluðu um að það þyrfti að ráðast í hagræðingu og niðurskurð í rekstri borgarinnar og ég lít á að kjósendur hafi gefið okkur umboð til þess. Við ætlum að ráðast í miklar hagræðingar og stjórnkerfisbreytingar. Við viljum fækka millistjórnendum. Við þurfum að einbeita okkur að grunnþjónustunni við íbúana. Við ætlum að taka fjármuni úr kerfunum og setja þá í hverfin.“
Hildur sagði að meirihlutinn væri ekki með nákvæma tölu á því hversu mörgum starfsmönnum yrði sagt upp en að sú vinna væri framundan.
