Níu karlmenn eru kærðir í tengslum við Straumsvíkurmálið svokallaða. Þar af eru sex erlendir ríkisborgarar og þrír íslenskir. Ákæruvaldið hefur farið fram á að gæsluvarðhald yfir mönnunum verði framlengt um fjórar vikur á grundvelli almannahagsmuna.
Ákæran, sem fréttastofa hefur undir höndum, er í þremur hlutum. Fyrri hluti ákærunnar er á hendur fimm erlendum mönnum: Vasile Costache, Arthur De Araujo Faria, Corneliu Radulescu, Eziquiel De Lima Pereira og Wagner Alexandre De Silva.
Þeir eru ákærðir fyrir skipulagða brotastarfsemi og stórfellt fíkniefnalagabrot með því að sammælast um og framkvæma innflutning á 106,2 kg af kókaíni. Styrkleiki efnanna var 77%-81% sem samsvarar 86%-91% af kókaínklóríði.
Fíkniefnin, sem voru ætluð til söludreifingar hér á landi í ágóðaskyni, voru falin í sjókistu flutningaskipsins Koznitza, sem kom til landsins frá Brasilíu þann 20. júní. Efnin voru aftur á móti fjarlægð af lögreglu daginn eftir komu skipsins til landsins og gerviefni sett í staðinn.
Taldir hafa sett gervikókaín í ferðatösku og bakpoka
Í ákærunni segir að Costache hafi ekið Faria, Silva og Pereira að skólphreinsistöðinni Hraunavík og skilið þá eftir með köfunarbúnað að kvöldi 23. júní.
Um nóttina hafi þeir síðarnefndu synt að skipinu, sem lá bundið við bryggju í Straumsvík, og sótt gerviefnin í sjókistuna. Þeir hafi synt til baka með efnin í fjöruna þar sem Faria beið þeirra og aðstoðaði við að koma efnunum í land.
Radulescu hafi sótt efnin á annarri bifreið og ekið á brott ásamt Faria og þeir haldið í Mosfellsbæ þar sem þeir dvöldu. Costache hafi þá komið til baka, sótt kafarana og ekið með þá til baka á hótel í Hafnarfirði sem þeir dvöldu á.
Daginn eftir, þann 24. júní, hafi þeir Radulescu og Faria komið 30 kg af gervikókaíni fyrir í ferðatösku og bakpoka. Radulescu hafi svo ekið efnunum í Kópavog síðar sama dag og afhent þau samkvæmt leiðbeiningum Faria og Costache.
Sýndi þúsund króna seðil og efnin voru afhent
Samkvæmt ákærunni voru það tveir Íslendingar sem tóku á móti efnunum. Það eru þeir Lúther Ólason og Lárus Freyr Einarsson, en í ákærunni segir að Atli Freyr Fjölnisson hafi gefið þeim fyrirmæli um móttöku efnanna í gegnum samskiptaforritið Signal.
Þremenningarnir eru ákærðir fyrir tilraun til stórfellds fíkniefnalagabrots í þriðja hluta ákærunnar. Í henni segir að Lárus hafi bæði verið í samskiptum við Atla og Faria í gegnum Signal.
Þá á Lúther að hafa sýnt Costache tiltekinn þúsund króna peningaseðil. Costache hafi þá gefið Radulescu fyrirmæli um að koma með efnin. Hann hafi þá komið akandi og Lúther sótt efnin í bílinn og fært þau í bifreið Lárusar.
Lárus og Lúther voru handteknir um tveimur mínútum síðar með gerviefnin í fórum sínum.
Lárus hefur áður hlotið dóm en hann var dæmdur í fjórtán ára fangelsi árið 2011 fyrir manndráp. Lúther hlaut tólf mánaða skilorðsbundið fangelsi fyrir meiriháttar skattalagabrot í héraðsdómi fyrir tveimur árum og Atli Freyr hefur áður hlotið fjögurra ára dóm í tengslum við fíkniefnalagabrot.
Ákærður fyrir að flytja inn kafarabúning
Í öðrum hluta ákærunnar er einum erlendum manni gefið að sök að hafa hlutdeild í brotinu með því að liðsinna mennina í verki. Á hann að hafa flutt kafarabúning, sem var notaður til verksins, frá Ítalíu.
Hann hafi skilið búninginn eftir við hlið ruslatunnu við gistiheimili í Reykjavík að loknu samtali við einn mannanna. Tveir mannanna hafi fylgst með og sótt búninginn strax í kjölfarið.
Þá gerir ákæruvaldið kröfu um upptöku á efnunum auk byssu og skotfæra sem fundust á heimilum tveggja mannana. Þá er einnig gerð krafa um upptöku á farsímum ákærðu, bifreið sem notuð var til að ferja köfunarbúnað til Íslands auk ýmissa hluta á borð við köfunarbúnað, neðansjávarvespa og sjópoka sem innihéldu fíkniefni, spritt og fúguspaðasett.
