„Það kemur ekki á óvart að Já sé ofar Nei en þetta er tæpt. Mjög tæpt,“ segir Eiríkur Bergmann Einarsson, prófessor í stjórnmálafræði við Háskólann á Bifröst, í samtali við DV um niðurstöður nýrrar könnunar sem sýnir að af þeim sem taka afstöðu ætla 53,1 prósent að segja Já en 46,9% að segja Nei í þjóðaratkvæðagreiðslunni 29. ágúst næstkomandi um hvort Ísland eigi að hefja á ný aðildarviðræður við Evrópusambandið.
Sjá frétt: Meirihluti ætlar að segja Já
„Stuðningurinn er mestur meðal miðaldra fólks, það er stærsti hópurinn sem styður aðildarviðræður en það dregur úr stuðningi meðal eldra fólks, sá hópur hefur verið duglegastur að skila sér á kjörstað,“ segir Eiríkur.
„Miðað við hvað þetta er tæpt mun niðurstaðan fara eftir mætingunni í þjóðaratkvæðagreiðsluna. Fyrir þá sem eru fylgjandi aðildarviðræðum mun þetta snúast að miklu leyti um að ná upp kjörsókn.“
Munurinn á afstöðu er töluverður þegar litið er til þess hvaða stjórnmálaflokk fólk myndi kjósa ef kosið yrði til Alþingis í dag.
„Það er athyglisvert að stuðningurinn sé svona mikill hjá stuðningsfólki Vinstri grænna, einnig að þriðjungur stuðningsfólks Framsóknarflokksins sé fylgjandi aðildarviðræðum. Ég hefði einnig haldið að niðurstaðan í Sjálfstæðisflokknum væri ekki jafn afgerandi. Niðurstaðan hjá Miðflokknum kemur minna á óvart,“ segir Eiríkur.
Á höfuðborgarsvæðinu ætlar meirihluti þeirra sem taka afstöðu að kjósa Já, á landsbyggðinni ætlar meirihluti fólks að kjósa Nei, áberandi mikill munur er á Austurlandi þar sem 76,1 prósent ætla að kjósa Nei.
Þessi afgerandi munur á Austurlandi, er þetta staðan eða getur þetta verið einhver tilfallandi skekkja?
„Það er alltaf til í dæminu að könnunin sé að ýkja þennan mun en við þurfum að sjá niðurstöður úr fleiri könnunum til að vita það með vissu.“
