Ný stjórnsýsluframkvæmd Náttúruverndarstofnunar vakti hörð viðbrögð ljósmyndara sem töldu hana skerða atvinnufrelsi sitt. Framkvæmdin tók gildi 17. maí og takmarkaði drónaflug á 26 friðlýstum svæðum víðs vegar um landið fyrir alla nema þá sem störfuðu við kvikmynda- og auglýsingagerð.
Ljósmyndarafélag Íslands taldi framkvæmdina skerða atvinnufrelsi ljósmyndara. Náttúruverndarstofnun brást við og breytti orðalagi í stjórnsýsluframkvæmdinni. Nú veitir stofnunin ekki aðeins leyfi fyrir kvikmynda- og auglýsingagerð heldur einnig vegna rannsókna, vöktunar, eftirlits, framkvæmda, kvikmyndatökuverkefna (s.s. kvikmyndagerð, auglýsinga, sjónvarpsþátta og í fréttaskyni), atvinnuljósmyndunar og leyfisskyldra viðburða.
Markmiðið að draga úr drónaflugi
Í tilkynningu frá stofnuninni kemur fram að tilgangurinn með stjórnsýsluframkvæmdinni hafi verið að draga úr drónaflugi á friðuðum svæðum, sem hefur aukist mikið.
„Rétt er að taka fram að meginmarkmiðið með breyttri framkvæmd var að draga úr umferð dróna í afþreyingarskyni sem hefur aukist undanfarin misseri. Stofnunin áréttar að sem fyrr geta ljósmyndarar sótt um leyfi til notkunar dróna á tilteknum friðlýstum svæðum að uppfylltum skilyrðum.“
Náttúrufræðistofnun fundar með Ljósmyndarafélaginu á næstu dögum.
