Bæjarstjórnarkosningar 2026

Í manna minnum hefur óánægja íbúa Fjarðabyggðar sjaldan mælst jafn mikil og með þann meirihluta sem nú skipar bæjarráð í fjarðabyggð, líkt og raunin hefur verið undanfarin fjögur ár, eða frá síðustu sveitarstjórnarkosningum. Andrúmsloftið er þungt og óánægjan er áþreifanleg. Þetta má meðal annars sjá á ótal færslum íbúa, bæði á samfélagsmiðlum (Facebook) og í samtölum sín á milli síðustu fjögur árin.

Frá upphafi þessa kjörtímabils hafa þessi fjögur ár einkennst af skítkasti og persónulegum orðaskiptum af hálfu oddvita Sjálfstæðisflokksins, þar sem umræðan hefur sjaldan verið málefnaleg gagnvart einstaklingum í öðrum flokkum. Í stað þess að vinna saman og leita lausna á uppbyggilegan hátt hefur frekar verið lögð áhersla á að gagnrýna aðra flokksmenn opinberlega og fara í persónulegt niðurrif, bæði á samfélagsmiðlum og í samskiptum sýnum við almenning, til dæmis á kaffistofum vinnustaða. Slík vinnubrögð eru hvorki fagleg né traustvekjandi — heldur beinlínis skaðleg fyrir traust og samstarf innan sveitarfélagsins.

Nú eru bæjarstjórnarkosningar fram undan og allir flokkar hafa sýnt fagleg vinnubrögð, pósta skemmtilegum vídeóum á samfélagsmiðla af raunhæfum markmiðum og allri þeirri vinnu sem er í gangi. Það sem sker sig þó úr eru vinnubrögð Sjálfstæðisflokksins. Þar virðist sú nálgun ríkjandi að afla sér fylgis með neikvæðri umræðu og sífelldri gagnrýni á aðra flokka og einstaklinga, í stað þess að byggja upp eigið traust með verkum. Við íbúar þessa sveitarfélags erum orðin ansi þreytt á þessu endalausa skítkasti og væli. Við viljum sjá samvinnu og virðingu fyrir öðru fólki og flokkum — ekki þessa stöðugu sundrungu — og að allri þessari orku og tíma sé varið í eitthvað jákvætt og uppbyggilegt fyrir Fjarðabyggð.

Jafnframt hefur verið lögð áhersla á að draga fram það fáa sem vel hefur gengið í Fjarðabyggð á síðustu fjórum árum og gortað sig af því á samfélagsmiðlum, líkt og það sé eingöngu þeirra flokki að þakka. Í ljósi þess má rifja upp orðatiltæki á borð við „oft glymur hæst í tómri tunnu“ eða að „skreyta sig með stolnum fjöðrum“. Íbúar vita hins vegar betur og gleyma ekki svo auðveldlega hvernig síðustu fjögur ár hafa í raun verið.

Þjónustan í sveitafélaginu er nú verri en nokkru sinni fyrr og gjöld hafa hækkað upp úr öllu valdi. Erindum bæjarbúa er ekki svarað, og þegar svör berast eru þau oft mjög loðin, óskýr og talað í hringi. Mikilvægar ákvarðanir hafa verið teknar án nægilegs samráðs við íbúa og án þess að hagsmunir þeirra hafi verið hafðir að leiðarljósi.

Það er ekki nóg að vera með fullt af flottum orðum í ræðum sínum og riti sem gervigreindin hefur sennilega skrifað og klæðast jakkafötum ef maður er með allt niðrum sig og illa skeindur bak við dulargervið. Kjörnir fulltrúar starfa í umboði íbúanna, og núverandi staða er ekki ásættanleg. X-D nei takk 

Íbúar kalla eftir breytingum.