Þúsundir mótmælenda komu saman í Kyiv í gær til að krefjast þess að Mykhailo Fedorov yrði aftur settur í embætti varnarmálaráðherra.
Volodmyr Zelensky Úkraínuforseti vék honum úr embætti um miðjan júlí eftir deilur á milli Fedorov og Oleksandr Syrsky, yfirhershöfðingja Úkraínuhers. Syrsky var síðar vikið úr embætti sömuleiðis.
Zelensky bauð Fedorov síðan aðrar stöður, en Fedorov hefur sagt að hann vilji eingöngu verða varnarmálaráðherra aftur.
Vinsæll meðal almennings og innan hersins
Fedorov er náinn samstarfsmaður Zelenskys og hefur unnið með forsetanum síðan hann var kosinn árið 2019. Hann naut stuðnings bæði meðal almennings og innan hersins fyrir áherslur á drónahernað, löngu áður en það var ljóst að drónar ættu eftir að verða ráðandi í átökunum við Rússa.
Fedorov gagnrýndi herinn fyrir sovéska nálgun og fyrir að láta sig mannfall ekki nægilega varða. Hann reyndi að koma á endurbótum innan hersins eftir hneykslismál tengd spillingu, skorti á búnaði, forföllum, meðferð herskyldra manna og herkvaðningu.
Núverandi varnarmálaráðherra Úkraínu er Yevhenii Khmara, sem var áður yfirmaður úkraínsku leyniþjónustunnar SBU. Hann hefur ekki gegnt ráðherraembætti áður.
