Hrafn Margeirsson var gestur í Spjallinu með Frosta Logasyni og þar segist hann vera sannfærður um að Covid bólusetningar hafi átt þátt í því að 21 árs dóttir hans fékk mjög ágengt ristilkrabbamein og lést aðeins þremur mánuðum eftir greiningu.
Í viðtalinu rekur Hrafn veikindasögu dóttur sinnar og leit sína að svörum eftir andlát hennar. Hann segir enga sögu um krabbamein eða erfðafræðilega áhættuþætti hafa verið í fjölskyldunni.
Segir framgang sjúkdómsins hafa verið óvenjulegan
Að sögn Hrafns lýstu læknar sem komu að meðferð dóttur hans sjúkdómnum sem afar ágengum og hröðum.
„Hún lifði ekki nema í þrjá mánuði frá því að hún greindist og þangað til hún var látin,“ segir hann.
Hann bendir á að ristilkrabbamein þróist yfirleitt hægt og sé algengara hjá eldri einstaklingum en ungu fólki. Þekkt sé að fólk geti verið með slíkt krabbamein í meira en áratug áður en það uppgötvast.
Hrafn segir að það sé afar sjaldgæft að einstaklingar á hennar aldri greinist með slíkt krabbamein án þekktra erfðafræðilegra skýringa.
Telur bólusetningarnar hafa spilað rullu
Í viðtalinu segir Hrafn að hann telji veikindin tengjast Pfizer bólusetningum sem dóttir hans fékk árið 2021.
Hann segist hafa aflað upplýsinga um lotunúmer bóluefnanna hjá heilsugæslunni eftir að Landspítalinn hafi ekki viljað afhenda þær upplýsingar.
Hrafn heldur því einnig fram að erlendar rannsóknir sýni fram á að ákveðin lotunúmer hafi innihaldið aðskotaefni og nefnir meðal annars E. coli, saurgerla og SV40 promoter. Hann segist hafa byggt niðurstöður sínar á upplýsingum úr mörgum áttum.
Frosti spyr hvort þetta séu opinberar upplýsingar eða samsæriskenningar og Hrafn svarar því til að hann telji upplýsingarnar byggja á rannsóknum og gögnum sem séu aðgengileg almenningi.
Hægt er að sjá brot úr viðtalinu hér fyrir neðan en ef þú vilt sjá allan þáttinn geturðu tryggt þér áskrift að Brotkast.is hérna.
