Formaður Félags íslenskra hjúkrunarfræðinga segir nauðsynlegt að vekja athygli á störfum hjúkrunarfræðinga og hversu mikilvæg stéttin er innan heilbrigðiskerfisins. Skilning á störfum þeirra skorti oft meðal almennings.
Mikilvægt að varpa ljósi á störf hjúkrunarfræðinga
Félag íslenskra hjúkrunarfræðinga hefur sett af stað auglýsingaherferð undir yfirskriftinni Við þurfum öll á hjúkrun að halda. Herferðin varpar ljósi á fjölbreytt störf hjúkrunarfræðinga. Helga Rósa Másdóttir, formaður, segir tímasetninguna enga tilviljun.
„Við erum að velta fyrir okkur breytingum á náminu og þá er mikilvægt að sýna bara hvað hjúkrunarfræðingar þurfa að hafa breiðan grunn til að geta sinnt fjölbreyttum störfum, sérstaklega á svona litlu landi eins og Íslandi, þá skiptir máli að við getum nýtt starfskraftana sem víðast,“ segir Helga.
Skilning skorti meðal almennings
Nám í hjúkrunarfræði er fjögur ár til BS-prófs og hefur verið í tæplega 50 ár. Helga segir að hjúkrunarfræðingar vilji fá náminu breytt til jafns við aðrar háskólamenntaðar heilbrigðisstéttir, þar sem BS-nám er þrjú ár og tvö ár í meistaranámi.
Helga segir ákveðinn skilning skorta á störfum og menntun hjúkrunarfræðinga meðal almennings. Stöðugt þurfi að minna á hvað hjúkrunarfræði er mikilvæg fagstétt.
„Að fólk skilji að þarna liggur að baki mikið nám og hjúkrunarfræðingar bera ábyrgð á meðferðum og setja sínar greiningar og fylgja eftir meðferðum og slíkt. Það svona loðir stundum aðeins við að það eina sem þurfi til að vera hjúkrunarfræðingur sé að vera góð kona.“
Staðan í stéttinni sé góð, en alltaf megi bæta við.
„Þannig að okkur fannst mjög mikilvægt að sýna fjölbreytnina ekki bara í störfunum, heldur líka að það er alls konar fólk sem fer í hjúkrunarfræði,“ segir Helga, og bætir við:
„Og þegar ungt fólk horfir á auglýsinguna, að það sjái að þarna eru svona strákur og svona karl, og allir sem geta fundið sig í hjúkrunarfræðinni.“
