Bandaríska rokkhljómsveitin The Hangmen stígur á svið í Tjarnarbíó þann 15. maí undir yfirskriftinni Los Angeles meets Reykjavík. Um er að ræða kvöld þar sem hrátt pönk og göturokk frá Los Angeles mætir íslenskri jaðarsenu.
Viðburðurinn er kynntur sem upplifun fremur en hefðbundnir tónleikar: hávaði, sviti og beinskeytt orka í forgrunni, þar sem lítið er lagt upp úr fínpússun en öllu meira upp úr stemningu.
Íslenskir „underground“ kraftar með
Auk The Hangmen koma fram nokkrir íslenskir listamenn sem eiga það sameiginlegt að starfa utan meginstraumsins. Þar má nefna Bleiku bastana, hOFFMAN og hljómsveit Dr. Gunna.
Samsetningin bendir til kvölds sem höfðar frekar til þeirra sem vilja eitthvað hrátt og ófyrirsjáanlegt frekar en öruggt og straumlínulagað.
Bleiku bastarnir – pönk, kaos og költ-status
Sérstaka athygli vekur aðkoma Bleiku bastana að þessu kvöldi, en margir telja þá hljómsveit í sjálfu sér vera hálfgerðan költ-kafla í íslenskri rokksögu.
Sveitin var stofnuð árið 1987 og vakti fljótt athygli fyrir hráan hljóm þar sem pönk, rokkabillí og rhythm & blues skullu saman. En það var ekki síður sviðsframkoman sem festi þá í sessi – tónleikarnir voru sjaldnast „bara tónleikar“ heldur frekar óútreiknanleg upplifun.
Söngvarinn Bjössi Basti var þekktur fyrir orkumikla framgöngu sem fór stundum yfir mörk hins hefðbundna – sem er einmitt ástæðan fyrir því að sveitin lifir áfram í minni þeirra sem upplifðu hana. Þrátt fyrir stuttan feril skildu þeir eftir sig spor, meðal annars með því að hita upp fyrir Sykurmolana, og útgáfa þeirra frá 1987 er í dag eftirsótt meðal safnara.
Feðgar á sviðinu – nýtt efni í burðarliðnum
Inn í dagskrána fléttast einnig verkefnið „Bjössi Basti + Thor“ þar sem ný kynslóð stígur á svið með þeirri eldri.
„Thor er sonur minn. Hann er að spila á bassa í einu lagi og trommur í öðru. Þetta er efni sem er mitt,“ segir Bjössi Basti í samtali við Nútímann.
Hann segir jafnframt að meira sé í farvatninu: „Ég er byrjaður að taka upp sóló plötu. Maður á svo mikið efni. Það verður annar Basti þar. Ég ætla að fá fullt af tónlistarmönnum og konum í þetta verk.“
Framkoman í Tjarnarbíói verður þannig ekki aðeins endurkoma heldur einnig innsýn í nýtt efni: „Þannig að þetta verður svona smá sýnishorn á það allt saman.“
Hrá upplifun í miðbænum
Tónleikarnir fara fram föstudagskvöldið 15. maí klukkan 20:00 og miðasala fer fram á tix.is
Fyrir þá sem sakna þess tíma þegar rokk var minna innpakkað og meira lifandi – gæti þetta kvöld reynst algjör negla.
