Alþingi samþykkti í gærkvöld lög um stofnun innviðafélags sem á að fjármagna og byggja upp samgöngumannvirki. Frumvarpið var samþykkt með 34 atkvæðum stjórnarliða en stjórnarandstæðingar greiddu ekki atkvæði um frumvarpið.
Stjórnarliðar lögðu áherslu á samþykkt frumvarpsins til að setja aukinn kraft í vegaframkvæmdir en stjórnarandstæðingar sögðu frumvarpið illa unnið og fela í sér gjaldtöku ofan á skatta sem þegar séu lagðir á ökutæki.
Atkvæðagreiðslan um innviðafélagið var síðasta verkefni kvöldfundar á Alþingi í gær sem lauk rétt á ellefta tímanum. Í dag tekur svo við síðasti þingfundadagur Alþingis áður en það fer í leyfi yfir sumarið, nema eitthvað óvænt gerist.
Þingfundur hefst klukkan 10:30 í dag og eru 22 mál á dagskrá. Þeirra á meðal eru nokkur þingmannamál stjórnarandstöðunnar sem var samþykkt að taka á dagskrá og afgreiða, svo sem um jarðakaup útlendinga, dreifingu ösku, gildistíma ökuskírteina og stimpilgjald á íbúðarhúsnæði.
Einnig eru mörg stjórnarfrumvörp á dagskrá. Þar á meðal um eftirlit með hollustuháttum og mengunarvörnum, gjaldtöku háskóla af erlendum nemendum, jöfnunargjald á raforkudreifingu, stuðning við einkarekna fjölmiðla og skipan nefndar til að kanna aðbúnað barna sem voru vistuð á einkaheimilum.
