Í sumar hefst leit að flaki skips sem fórst undan ströndum Íslands árið 1682. Talið er að aldrei hafi verðmætari farmur sokkið við Íslandsstrendur en farmur umrædds skips sem var á leið til Kaupmannahafnar þegar það fórst út af Langanesi.
Fjallað er um leitina í Morgunblaðinu í dag.
Skipið sem um ræðir, Höfðaskip, fórst í ofsaveðri en um borð var meðal annars Hannes Þorleifsson handritasafnari en hann var forveri Árna Magnússonar handritasafnara. Talið er að allt handritasafn Hannesar hafi verið um borð og ýmsir aðrir verðmætir gripir. Þar á meðal er afrit af Sturlungu svo eitthvað sé nefnt.
Í umfjöllun Morgunblaðsins í dag kemur fram að búið sé að afmarka leitarsvæði sem er nokkrir tugir ferkílómetra að stærð. Verður hafsbotninn meðal annars skannaður í sumar í þeirri von að flak skipsins finnist.
Búið er að leggjast í mikla vinnu við að kortleggja leitarsvæðið en Steinunn Kristjánsdóttir, fornleifafræðingur sem fer fyrir verkefninu, segir að hópurinn renni blint í sjóinn því ekki sé öruggt að flakið leynist á umræddu leitarsvæði.
„Þetta er fjársjóðsleit, ég viðurkenni það alveg, þótt það hljómi ekki mjög vísindalega. Við erum náttúrulega að reyna að sjá hvað var þarna um borð,“ segir hún við blaðið.
Fjallað var um verkefnið á heimasíðu Háskóla Íslands árið 2024 og þar kom fram að flutningaskip á borð við Höfðaskip sigldu yfirleitt með fram ströndinni og sukku því alla jafna skammt undan landi. Neðansjávarmælingar hafi gefið til kynna að flökin liggi að meðaltali sex kílómetra frá strandlínunni.
„Það er því góð von að flak Höfðaskips finnist. Takist okkur að staðsetja það stefnum við að frekari rannsókn á því en vitað er að skip frá þessum tíma hafa varðveist vel í sjónum,“ sagði Steinunn á þeim tíma.
Þá kom fram að Hannes hafi verið skipaður í embætti fornfræðings konungs af Kristjáni V Danakonungi árið 1681.
Verkefni Hannesar sneru fyrst og fremst að því að safna fornum handritum á Íslandi og flytja þau til Kaupmannahafnar en á þessum tíma hafði Danakonungur mikinn áhuga á söfnun íslenskra miðaldahandrita.
