Landsliðskona opnar sig um erfið veikindi og fósturmissi

Missy Bo KearnsMissy ætlar sér að snúa aftur á völlinn í haust

Mynd: ADRIAN DENNIS / AFP

Enska knattspyrnukonan Missy Bo Kearns segir frá erfiðum veikindum og fósturmissi í nýju viðtali, þar sem hún greindist með blóðeitrun á sama tíma og hún missti fóstur.

Í byrjun mars greindi Kearns frá því að hún og kærasti hennar, Liam Walsh, ættu von á barni. Sú gleðifrétt breyttist hins vegar fljótt í harmleik.

Í viðtali við ITV segir hún að hún hafi veikst skyndilega með 42 stiga hita og farið á sjúkrahús. Þar hafi henni strax verið tilkynnt að hún hefði misst fóstrið og jafnframt verið greind með blóðeitrun.

„Við fórum á sjúkrahús og okkur var strax sagt að við hefðum misst barnið og að ég væri með blóðeitrun,“ segir Kearns.

Hún lá inni á sjúkrahúsi í nokkra daga og lýsir tímanum sem afar erfiðum. „Við gengum í gegnum þrjá til fjóra daga af hreinu helvíti á sjúkrahúsinu í Birmingham. Ég held að við höfum ekki gert okkur grein fyrir því hversu mikið við gengum í gegnum fyrr en núna, þegar maður sest niður og hugsar um það,“ segir Kearns.

Hún segist í raun ekki hafa viljað fara á sjúkrahúsið.

„En þeir björguðu líklega lífi mínu því ég var með blóðsýkingu, og á meðan ég var með hana hugsaði ég ekki einu sinni um blóðsýkinguna. Það eina sem ég hugsaði var: „Ég hef misst barnið mitt“.“

Vill snúa aftur

Kearns liggur ekkert á að snúa aftur í fótboltann, en hún er samt staðráðin í að vera komin á völlinn þegar næsta tímabil hefst í haust. Þá vill hún komast í HM-hóp Englands árið 2027.

Hún segist í raun ekki hafa viljað fara á sjúkrahúsið.

„Ég vil koma til baka á undirbúningstímabilinu og vera sú Missy Bo sem allir þekkja, brosandi, glöð og einhver sem hvetur alltaf aðra,“ segir hún.

Missy Bo Kearns spilar með Aston Villa í ensku úrvalsdeildinni og hefur einnig leikið með enska landsliðinu. Kærastinn Liam Walsh spilar með Luton Town í ensku C-deildinni.