Ísland mun aldrei ganga inn í Evrópusambandið nema að loknum tveimur þjóðaratkvæðagreiðslum og mun þjóðin því eiga síðasta orðið hvað þetta varðar.
Þetta kom fram í svari Kristrúnar Frostadóttur forsætisráðherra við fyrirspurn Stefáns Vagns Stefánssonar, þingmanns Framsóknarflokksins, í óundirbúnum fyrirspurnartíma á Alþingi áður en framhald síðari umræðu um þjóðaratkvæðagreiðslu í tengslum við ESB-aðild hófst í þingsal.
Stefán Vagn nefndi að það hefði komið skýrt fram í máli forsætisráðherra og umhverfis- og orkumálaráðherra að væri samningurinn ekki góður yrði hann ekki lagður í dóm þjóðarinnar. „Verður sá samningur sem hæstvirtur forsætisráðherra metur að sé ekki góður þá ekki lagður í hendurnar á þjóðinni?” spurði hann.
Tvöföld aðkoma söguleg
„Þetta er sögulegt þegar kemur að slíkum viðræðum, bæði hér á Íslandi og annars staðar, tvöföld aðkoma þjóðar í þessu máli,” sagði Kristrún. Ef þjóðin myndi ákveða að fara í samningaviðræður við ESB þyrfti að koma í ljós hvort samningurinn stæðist samningsmarkmið.
„Í haust erum við að kjósa um hvort við eigum að hefja viðræður eða ekki. Þetta hefur aldrei verið gert. Hér hafa viðræður farið af stað, þeim hefur lokið og þeim hefur verið í raun kippt úr sambandi án þess að spyrja kóng né prest,” sagði Kristrún jafnframt.
„Höldum okkur við aðalatriði málsins. Við erum að hefja ferlið á sem lýðræðislegustu forsendum. Það þarf enginn að hafa áhyggjur af því að þjóðin muni ekki hafa rækilega aðkomu að þessu máli. Höldum okkur við kjarna máls.”
Óskýrt að þjóðin eigi fyrsta og síðasta orðið
Stefán Vagn sagði í framhaldinu: „Mér finnst það óskýrt að segja að þjóðin eigi fyrsta og síðasta orðið og segja svo næst að við munum ekki koma heim nema með góðan samning.”
Kristrún steig þá í pontu og sagði kjarna málsins vera þennan: „Ísland mun aldrei ganga inn í Evrópusambandið nema að afloknum tveimur atkvæðagreiðslum. Það er kjarni máls. Ísland gengur ekki í Evrópusambandið nema eftir að þjóðin hefur sagt já tvisvar.”
