Umdeildur spýtukofi í Vesturbæ Reykjavíkur fær að standa, að minnsta kosti fram í október.
Það vakti nokkra athygli þegar greint var frá því að Reykjavíkurborg hygðist fjarlægja kofann sem börn smíðuðu í sameiningu við Lynghaga. Ástæðan var að kofinn væri ekki öryggisvottaður.
„Það var í rauninni bara misskilningur og eitthvað sem ætti ekki að þurfa,“ segir Anna Kristín Blöndal Jóhannsdóttir, íbúi á Lynghaga og foreldri barna sem tóku þátt í kofasmíðinni. „Það að flokka þetta sem leiktæki er ekki rétt af því þetta er smíðakofi.“
Anna Kristín segir að samkomulag hafa náðst við borgina um að kofinn fái að standa.
„Þetta er svona leyfi, sem allir borgarbúar geta sótt um, sem er að hafa afnot af borgarlandi í einhvern tíma. Við sóttum um það og fengum leyfið samþykkt.“
Það var veitt fram í október.
„En svo var okkur sagt að við gætum alveg sótt um og endurnýjað eftir þörfum.“
Hún segir málið upphaflega hafa verið falið röngu sviði hjá Reykjavíkurborg.
„Þau fullvissuðu okkur um að þetta hefði bara verið einhver allsherjar misskilningur og að annað svið innan Reykjavíkurborgar væri að misskilja. Umhverfis- og skipulagssvið vill endilega að svona kofar fái að standa og að börnin fái að nota sköpunargleðina í leik.“
Tíðindin hafa vakið mikla gleði í Vesturbænum, sérstaklega meðal barna. Blásið verður til hverfisveislu við kofann í kvöld en Anna Kristín átti í fullu fangi með stóran krakkaskara þegar fréttamaður náði tali af henni.
Hún hafði orð á því að miður væri ef samskiptaleysi innan Reykjavíkur kæmi í veg fyrir að börn í borginni gætu leikið sér.
„Þetta vekur alveg upp spurningar. Maður veltir því fyrir sér af hverju stjórnsýslukerfið í Reykjavík er svona ótrúlega ógagnsætt. Hvers vegna sum svið geta tekið sér leyfi sem þau hafa í raun ekki. Önnur svið vita í rauninni ekkert hvað er í gangi,“ segir Anna Kristín.
