Karl Gústaf Svíakonungur er 80 ára í dag. Hann er sá þjóðhöfðingi í Evrópu sem hefur setið lengst á stóli og sá þaulsetnasti í Svíþjóð. Fyrirmenni frá gervallri Evrópu verða viðstaddir afmælisfögnuðinn, þar á meðal Halla Tómasdóttir forseti Íslands.
Karl Gústaf fæddist 30. apríl 1946 og varð konungur 1973 þegar afi hans, Gústaf fimmti, lést. Karl Gústaf var aðeins níu mánaða þegar faðir hans lést í flugslysi.
Hann giftist Silvíu Sommerlath í júní 1976 og á því einnig 50 ára brúðkaupsafmæli í ár. Þau eiga þrjú börn, Viktoríu krónprinsessu, Karl Filipp og Magdalenu.
Karl Gústaf er sá þjóðhöfðingi sem hefur setið lengst allra á valdastóli í Svíþjóð.
Hátíðarhöldin vegna stórafmælisins hófust klukkan tíu í morgun með guðþjónustu í kirkju hallarinnar.
Halla Tómasdóttir, forseti Íslands, og Björn Skúlason, eiginmaður hennar, voru viðstödd athöfnina í morgun.
Eftir guðþjónustuna hafði konungur síðan umsjón með varðskiptum í hallargarðinum. Sænski herinn heiðraði konung í athöfn þar og almenningur færði honum blóm.
Öryggisgæsla í Stokkhólmi er mikil vegna tímamótana og mest í kringum höllina. „Við höfum verið að skipuleggja öryggisráðstafanir frá því í vetur svo við getum viðhaldið öryggi í kringum alla viðburðina,“ sagði Michael Fetz, yfirmaður hjá lögreglunni, við sænska ríkisútvarpið, SVT, í morgun.
Karl Gústaf var í viðtali hjá SVT í gær. Hann var spurður út í tímamótin. „Afmæli verður á hverju ári þannig að það er ekki það mikið mál. En það er tilvalið að nýta tækifærið og bjóða vinum og vandamönnum og gera eitthvað saman.“
Hann var einnig spurður út í væntingar á afmælisdaginn. Svarið var einfalt. „Að það rigni ekki. Það væri hörmung. Það væri synd fyrir alla sem að hátíðarhöldunum koma. Það koma margir gesti frá Evrópu svo ég vona að þetta verði góður dagur fyrir okkur, gestina og að við eigum ánægjulegt kvöld saman. Ég vona að þetta verði góð minning og upplifun.“
Konungurinn sagði ákvörðun frænku sinnar Margrétar Þórhildar Danadrottningar um að stíga af valdastóli hafa komið á óvart. Hann sagði ólíklegt að hann fari sömu leið. „Maður heldur áfram meðan heilsan leyfir.“
