Júní og júlí voru þeir heitustu í vesturhluta Evrópu frá því mælingar hófust. Met var einnig slegið í hitastigi heimshafanna í júlí, annan mánuðinn í röð að því er segir í nýrri skýrslu evrópsku loftslagsstofnunarinnar Kóperníkusar.
Meðalhitinn mældist 20,96 gráður sem er met. Þar réðu mestu hitabylgjur í Evrópu og ekki síst myndun óvenju öflugs El Niño-veðurfyrirbæris í Kyrrahafi.
Það ræður sennilega mestu að mati Carlos Buontempo, forstjóra stofnunarinnar. Fyrirbærið varð til þess að árin 2023 og 2024 urðu næstheitustu og heitustu árin frá því mælingar hófust.
Buontempo segir vísindamenn stofnunarinnar vænta nýs mets í meðalhitastigi jarðar síðar á þessu ári eða í byrjun þess næsta.
Hver hitabylgjan af annarri gekk yfir vestur- og miðhluta Evrópu í júní og júlí með miklum þurrkum og gróðureldum. Meðalhitinn nam 21,62 gráðum og sló þar með metið frá árinu 2022.
Meðal annars var mjög þurrt í Frakklandi, Spáni, Ungverjalandi og einnig á Írlandi og hluta Íslands að sögn Kóperníkusar. Rakastig jarðvegs var töluvert minna í júlí en 2022 þegar síðasti alvarlegi þurrkurinn herjaði á Vestur-Evrópu.
Sérfræðingar Kóperníkusar segja það til marks um hvernig loftslagsbreytingar kynda undir öfgum með hringrás sem veldur því að mikill hiti og þurrkur magni hvorn annan upp í auknum mæli.
