Jón Gnarr, þingmaður Viðreisnar og skemmtikraftur, segir í yfirlýsingu á Facebook ekkert hæft í þeim fréttum mbl.is frá í gærmorgun að hann hafi fengið greitt fyrir að koma fram í þættinum Vikan með Gísla Marteini á RÚV 20. mars.
Hið sama eigi við um Sigurjón Kjartansson sem kom fram með Jóni í atriðinu þar sem gert var grín að þeim sem hyggjast segja nei við ESB-aðild.
Vísað hafi verið í fundargerð stjórnar RÚV þar sem Stefán Eiríksson útvarpsstjóri hafi svarað fyrirspurn Ingvars Smára Birgissonar, fulltrúa Sjálfstæðisflokksins, þannig að Jón fengi greitt líkt og aðrir skemmtikraftar sem komi fram í ríkissjónvarpinu.
Jón segir mbl.is hvorki hafa spurt sig né Sigurjón og sakar miðilinn um óvandaða blaðamennsku og að leika „pólitískan hráskinnaleik“ með Sjálfstæðisflokknum. „Það var með vilja gert því þá hefði blaðamaður komist að sannleika málsins. En það var bara ekki tilgangurinn,“ segir Jón.
Hann sé ekki yfirlýstur stuðningsmaður inngöngu Íslands í ESB líkt og Ingvar hafi staðhæft á stjórnarfundi en sé opinn fyrir því að vega og meta kosti hennar, líkt og hann hafi oft lýst yfir.
Jón kveðst oft hafa komið fram í Vikunni án þess að fá greitt enda hafi hann ekki ætlast til þess.
Hann hafi á löngum ferli án endurgjalds komið fram í ótal skemmti- og spjallþáttum, mörgum styrktarverkefnum og söfnunum, leikið í stuttmyndum og útskriftarverkefnum í Kvikmyndaskólanum, sem hann líti á sem ákveðna skyldu til stuðnings við íslenska tungu, innlenda framleiðslu og dagskrárgerð.
Hér fyrir neðan má sjá yfirlýsingu Jóns í heild sinni:
