Jarðskjálfti af stærðinni 5,5 varð í austur Egyptalandi í nótt. Skjálftinn átti upptök sín um 40 kílómetra norður af borginni Suez um klukkan þrjú í nótt að staðartíma.
Ekki hafa borist fregnir af manntjóni eða eyðileggingu. Skjálftinn fannst á stóru svæði allt frá höfuðborginni Kaíró og að El-Arish sem er nærri landamærunum við Gaza. Öflugir jarðskjálftar eru sjaldgæfir í Egyptalandi.
Yfirvöld hafa virkjað neyðaráætlanir í landinu og fyrirskipað sjúkraflutningafólki að vera í viðbragðsstöðu. Egypski Rauði hálfmáninn hvatti fólk til að halda sig fjarri gömlum og niðurníddum byggingum, sem eru algengar í sumum af verkamannahverfum Kaíróborgar.
Einn mannskæðasti skjálftinn í landinu varð í október 1992 þegar yfir 500 fórust í jarðskjálfta af stærðinni 5,8 og þúsundir misstu heimili sín í skjálftanum.
