„Ég hringdi einu sinni í konuna hans til þess að spyrja hvernig Guðmundur hefði það og hvort hann gæti tekið á móti gestum og ég upplifi þetta ekki í neinu samhengi við það sem þarna kemur fram.“
Þetta sagði Inga Sæland í kvöldfréttum RÚV um yfirlýsingar Guðmundar Inga Kristinssonar, fyrrverandi ráðherra og liðsmanns flokksins. Þau eru ósammála um hvort það hafi verið hans ákvörðun að víkja úr ráðherraembætti í janúar.
„Það var ég sem skipaði hann í þetta embætti og það var hann sem sagði því af sér. Það er líka staðreynd,“ sagði Inga. Hún hafnar því að hafa gert honum að hætta sem ráðherra en Guðmundur segist hafa viljað halda áfram eftir að hann næði sér eftir aðgerðina. Svo fór að Inga tók við af honum sem mennta- og barnamálaráðherra.
Enginn sannleikur
„Það er ekkert um sannleika að ræða, það er bara um upplifun. Ég er ekki að upplifa þessa hluti eins og Guðmundur Ingi Kristinsson gerir, engan veginn. Og ég er bara ofsalega leið og sár yfir þessari framgöngu hans núna á þessum tímapunkti,“ sagði Inga í kvöldfréttum RÚV. Það sé ljóst að hann sé ósáttur við að gegna ekki lengur ráðherrastöðu.
Inga segir afsögn Guðmundar úr flokknum sem hann tilkynnti í apríl hafa komið sér í opna skjöldu. Hún sakni Guðmundar og vilji sjá hann aftur bera merki Flokks fólksins.
Inga hefur ekki gefið Vísi kost á viðtali í dag.
Segir Ingu hafa krafist þess að komast inn á sjúkrastofuna
Guðmundur hefur greint frá því að Inga hafi verið ágeng á meðan hann jafnaði sig á sjúkrahúsi eftir hjartaaðgerð í desember. Hún hafi krafist þess að komast inn á sjúkrastofu hans til að segja honum að hann þyrfti að hætta sem ráðherra. Það gerði Guðmundur tólf dögum síðar og tilkynnti svo afsögn úr flokknum í apríl.
„Það sem varð þess valdandi að ég ákvað að fara úr Flokki fólksins var samtal sem Inga Sæland átti við konuna mína í bifreið, þar sem hún var á leið heim frá sjúkrahúsinu þar sem ég var búinn að vera í aðgerð. Níu dögum eftir aðgerðina,“ sagði Guðmundur Ingi við RÚV.
Inga hafi viljað hitta hann á sjúkrastofunni vegna þess að hann hafi verið of lengi frá. Hann þyrfti að hætta sem ráðherra.
Guðmundur segir að þetta hafi verið á þriðja degi jóla í fyrra og konan hans hafi neitað því að hleypa Ingu inn á sjúkrastofuna. Erindið mætti bíða þar til hann hefði verið útskrifaður.
Kvaðst sjálfur hafa tekið ákvörðun um afsögn
Guðmundur veitti takmarkaðar skýringar á afsögn sinni úr flokknum þegar greint var frá henni í apríl og vísaði í ótilgreindan persónulegan trúnaðarbrest sem varðaði persónuleg samskipti innan flokksins. Þegar hann tilkynnti brotthvarf úr ráðherrastól þann 8. janúar gaf hann til kynna að það hefði verið hans ákvörðun.
„Að vandlega ígrunduðu máli hef ég ákveðið að segja af mér embætti mennta- og barnamálaráðherra vegna veikinda. Eins og fram hefur komið gekkst ég undir opna hjartaaðgerð fyrir jól og fram undan er nú bataferli,“ sagði Guðmundur í yfirlýsingu á þeim tíma.
Hann segir nú í samtali við RÚV að aðstoðarkona hans hafi sent honum texta sem nota átti í tilkynningu um afsögnina. Sú aðstoðarkona hafi verið eiginkona Ragnars Þórs Ingólfssonar en hann varð ráðherra þegar Inga færðist úr félagsmálaráðuneytinu í stól mennta- og barnamálaráðherra sem Guðmundur sat í fram að því.
Fréttin hefur verið uppfærð.
