Stjórn Eflingar lýsti samstöðu með Wolt-sendlum í dag eftir að um 60 sendlar lögðu niður störf í gær til að mótmæla kjaraskerðingu. Þeir sögðu fyrirtækið hafa lækkað laun þeirra um allt að 40 prósent á einu ári. Starfsfólk Eflingar hefur undanfarið verið í samskiptum við nokkra sendla og mun funda með þeim á næstu dögum.
„Á fundi stjórnar var tekin ákvörðun um að bjóða þeim afnot af húsakynnum félagsins til þess að funda og við erum líka tilbúin til þess að bjóða þeim aðgang að starfsfólki félagsins jafnvel þótt þeir séu ekki félagsmenn,“ segir Sólveig Anna.
„Við bindum bara miklar vonir við að við getum liðsinnt þeim í þessum erfiðu aðstæðum sem þeir eru í,“ segir hún.
Wolt segir greiðslur fyrir sendingar hafa haldist stöðugar
Forsvarsmenn Wolt gáfu ekki kost á viðtali en segja í yfirlýsingu að greiðslur fyrir einstaka sendingar hafi haldist nokkuð stöðugar síðasta árið. Að meðaltali fái sendlar um sex þúsund á hverja virka vinnustund séu þeir að fara með sendingar, en mismikið sé greitt eftir til að mynda vegalengd.
Jafnframt segir að áhyggjur sendlanna séu teknar alvarlega og fulltrúum þeirra hafi verið boðið á fund með forsvarsmönnum Wolt.
Samkvæmt útreikningum ASÍ eru þá um það bil 1.800 krónur eftir af þeirri upphæð þegar launatengd gjöld og kostnaður við rekstur bíls eru dregin frá.
Versta tegund gerviverktöku
Sólveig Anna segir Wolt stunda verstu tegund af gerviverktöku. „Vegna þess að þarna ertu með hóp innflytjenda sem er í erfiðri stöðu og þeim er boðið upp á að vinna fyrir kjör sem eru langt undir lágmarkskjörum kjarasamninga,“ segir hún.
„Til viðbótar við það eru þeir ekki með nein af þeim lögbundnu réttindum sem við sem tilheyrum stéttarfélögum erum með.“
Ættu að hegða sér eins og hæfir siðmenntuðu samfélagi
Wolt hafnar því alfarið að stunda gerviverktöku. Fyrirtækið sé með öll tilskilin leyfi og réttindi. Þá ráði sendlarnir sjálfir hvort þeir samþykki sendingu eða ekki.
„Ég held að forsvarsmenn þessa fyrirtækis ættu, í stað þess að reyna að gaslýsa almenning og sendla, að endurskoða viðskiptamódelið sitt og fara að hegða sér eins og hæfir siðmenntuðu samfélagi,“ segir Sólveig.
Efling hafi fylgst með baráttu stéttarfélaga og sendla á Norðurlöndunum og geri áfram. Nú sé í gangi dómsmál í Noregi sem gæti orðið fordæmisgefandi.
Sólveig segir óboðlegt að Wolt komist upp með þessa starfshætti. „Ég held að þetta sé bara til háborinnar skammar fyrir íslenskt samfélag. Að það sé hægt að komast upp með að bjóða fólki upp á þessar aðstæður,“ segir Sólveig Anna.
