Guðmundur Ingi Kristinsson, fyrrverandi mennta- og barnamálaráðherra og fyrrverandi varaformaður Flokks fólksins, segir að samtal Ingu Sæland, formanns flokksins sem nú situr í fyrrverandi ráðuneyti Guðmundar Inga, við eiginkonu hans hafa valdið úrsögn hans úr flokknum.
Þar hafi Inga krafist þess að fara inn á sjúkrastofu Guðmundar þar sem hann lá og jafnaði sig eftir hjartaaðgerð sem hann fór í í desember í fyrra. Erindið hafi verið að gera honum ljóst að hann yrði að hætta sem ráðherra.
„Henni fannst ég hafa verið allt of lengi frá, í níu daga og þetta gengi ekki upp. Ég yrði bara að hætta sem ráðherra,“ segir Guðmundur.
Krafinn afsagnar á þriðja degi jóla
„Það sem sló líka, bæði mig og eftir á og hana líka var að þetta var á þriðja degi jóla. Á milli jóla og nýárs er hvorki þing né annað í gangi þannig að það lá ekkert á að gera þetta, það mátti alveg bíða með þetta þangað til ég væri kominn að minnsta kosti heim.“
Síðan hafi atburðarásin haldið áfram.
„Stuttu seinna fæ ég sent frá aðstoðarkonu minni að aðstoðarmaður Ingu hafi hringt í hana og hún sendi mér texta um hvernig ég ætti að segja af mér.
Þá fór mér nú að blöskra mikið því aðstoðarkona mín á þessum tíma var eiginkona Ragnars Þórs Ingólfssonar sem átti að fá mína stöðu þegar ég færi út. Þarna fannst mér aðstoðarmenn komnir langt út fyrir sitt svið. Ég hugsaði með mér að svona vinnubrögð gætu bara ekki gengið upp.“
Þannig að ég tók þá ákvörðun að fara ekki í neinn fæting, heldur bara gjörsamlega hætta. Þar var það aðallega heilsunnar vegna því ég legg ekki heilsuna undir. Ekki fyrir ráðherrastól, ekki fyrir eitt eða neitt.
„Ég ætlaði ekkert að fara að nota einhvern texta frá aðstoðarkonu minni til að segja af mér, ég þurfti ekkert á því að halda og samdi síðan texta með aðstoð annarra, sem ég vildi að kæmi að þessum texta, og þannig fór þetta fram.“
Enginn hafði samband
Treystir þú ekki aðstoðarmanni þínum? „Mér fannst þetta bara ekki vera í hennar verkahring.“
Þú talar sérstaklega um þennan tiltekna aðstoðarmann og nefnir að þetta sé eiginkona Ragnars Þórs Ingólfssonar. Finnst þér eins og það hafi verið samsæri gegn þér; fólk búið að taka sig saman um að þú myndir hætta?
„Ja, að minnsta kosti er staðreyndin sú að það var ekki einn einasti sem hafði samband við mig, hvorki meðan á aðgerðinni stóð né eftir aðgerðina, heldur fékk ég hvatningu frá þeim sem eru fyrir utan flokkinn.“
Hafði enginn af samflokksþingmönnum samband meðan þú lást inni á spítala? „Nei.“
Einhver af ráðherrum flokksins? „Nei.“
Formaður flokksins? „Nei.“
Hvernig leið þér með það? „Það var skrýtið, en þetta voru ákvarðanir sem voru teknar þarna. Greinilega var búið að taka þessa ákvörðun strax um jólin, eða fyrir jólin. Því Inga hefur samband við konuna mína á þriðja í jólum og það var greinilega þá búið að gefa það út að ég yrði ekki lengur ráðherra og það ætti ekki að hafa lengur samband við mig.“
Segir að traustið hafi verið farið
Hefði verið hægt að leysa þetta á einhvern annan hátt, ná sáttum án þess að þú þyrftir að segja þig úr flokknum? „Nei, ég taldi þetta það mikinn trúnaðarbrest að ég taldi mig ekki eiga þarna erindi lengur.“
Hættirðu að treysta formanni flokksins? „Algjörlega.“
Hefur Inga Sæland einhverntímann útskýrt þessa hegðun, þegar hún vildi koma inn á sjúkrastofuna þína? „Nei.“
Hefurðu beðið hana um að útskýra þetta? „Það var smá samtal þar sem kom eiginlega ekkert fram. Út af hverju eða hvers vegna.“
Hefði viljað snúa aftur í ráðherrastól
Guðmundur Ingi segir aðgerðina hafa gengið vel, hann hafi verið fljótur að ná sér og kominn á gott ról á einum og hálfum mánuði.
Hefðirðu viljað snúa aftur í ráðherrastól eftir að veikindaleyfinu lauk og þú varst búinn að ná heilsu? „Já já, það stóð ekkert annað til af minni hálfu.“
Hefur verið boðið í alla flokka
Síðan Guðmundur Ingi sagði sig úr Flokki fólksins i apríl hefur hann setið á Alþingi utan flokka. Hann segist kunna vel við það, að vera sinn eigin herra.
„Þetta er bara öðruvísi og það er búið að bjóða mér í flokka, hina og þessa flokka.“
Í hvaða flokka hefur þér verið boðið? „Það er búið að nefna við mig að ég sé velkomin í alla flokka á þingi.“
Hafa allir flokkar á Alþingi boðið þér að ganga í þingmannaliðið? „Já, einhverjir úr öllum flokkum. Hvort það sé einhver alvara á bak við það, veit ég ekki. En ég hef bara ekki látið reyna á það.“
Hefurðu íhugað það af einhverri alvöru? „Nei.“
Ósanngjarnt að fara þessa leið
Guðmundur Ingi segir að það hafi ekki komið til greina að segja af sér þingmennsku í kjölfar þess að hann sagði sig úr flokknum.
„Vegna þess að þessi atburðarás sem fór af stað var ekki komin frá mér. Það á ekki að vera ástæða til að svona hlutir gerist við það eitt að þú veikist. Ég tel að það sé eitthvað skrýtið ef það á að nota tækifærið, þegar fólk er á sinni veikustu stundu, að sparka í mann liggjandi.“
Leyfum fólki að fara í gegnum aðgerðir og jafna sig áður en við förum af stað. Ég veit t.d. að Inga sjálf var í burtu í 3–4 vikur, það er helmingi meira en hún taldi að ég mætti vera í burtu. Fyrir utan það; þá hafa ráðherrar verið í burtu í 4–5 mánuði út af fæðingarorlofi eða eitthvað. Það var ekki himinn og jörð að farast þó ég hefði þurft að vera frá í 1 1/2–2 mánuði.
Þú notar orðalagið: Sparkað í þig liggjandi; var það þannig sem þú upplifðir þetta? „Já, mér fannst það vegna þess að mér fannst þetta eftir á ótrúlega ósanngjarnt, að fara þessa leið.“
Ekki gert af neinni léttúð
Hvernig hafa samskipti þín við Ingu Sæland og aðra þingmenn og ráðherra Flokks fólksins verið síðan þetta var? „Samskipti mín við Ingu eru engin.“
Þið hafið verið samherjar lengi, gengið í gegnum ýmislegt saman – er ekki erfitt að slíta samskiptum við einhvern sem maður hefur unnið svona lengi með og þekkir svona vel? „Auðvitað. Það segir sig sjálft. Og það er ekki gert af neinni léttúð.“
Ertu sár? „Nei.“
Hefðirðu viljað að þetta hefði farið á einhvern annan hátt? „Auðvitað. Það var alger óþarfi að þetta færi svona. Algjör óþarfi. Og það er kannski það sorglegasta við þetta – að það hefði verið hægt að leysa þetta algerlega án þess að fara þessa leið.“
