Íranska utanríkisráðuneytið sagði í dag að einhver hreyfing væri komin á viðræður milli þarlendra stjórnvalda og sáttasemjara um framtíð Hormússunds.
Hlé hefur verið á stríði Írans og Bandaríkjanna síðustu nætur. Nóttin í nótt var sú þriðja í röð þar sem ekki berast fregnir af árásum milli ríkjanna. Í nærri tvær vikur þar á undan höfðu ríkin skipst á hörðum árásum daglega.
Háttsettur embættismaður innan íranska stjórnkerfisins sagði við Reuters í gær að Íranar myndu gera hlé á sínum árásum eins lengi og Bandaríkin gera það. Hann sagði stjórnvöld í Tehran ekki binda miklar vonir við að hlé árása af hálfu Bandaríkjanna væru til marks um raunverulega breytingu á viðhorfi Bandaríkjamnna til samningaviðræðna.
Óljóst hvað skýrir hléið
Um helgina lagði Doanld Trump Bandaríkjaforseti til hliðar áætlanir um að herða allverulega á árásum Bandaríkjanna á Íran. Heimildarmenn New York Times segja að þverrandi birgðir af varnarbúnaði sem er notaður til að verjast flugskeytum Írana hafi einkum ráðið því.
Mike Waltz, sendiherra Bandaríkjanna hjá Sameinuðu þjóðunum vísaði þessari skýringu á bug í viðtali við Fox News og sagði Bandaríkjaher kláran í slaginn. Trump hefði ákveðið að gera hlé á árásunum til að skapa svigrúm fyrir viðræður.
Bandaríkjaforseta hefur gengið erfiðlega að binda varanlegan enda á stríðið sem Bandaríkin og Ísrael hófu fyrir nærri fimm mánuðum síðan. Það hefur haft talsverð áhrif á heimshagkerfið, þar sem flutningar um Hormússund hafa nær stöðvast eftir að stríðið hófst. Um fimmtungur olíu og jarðgasi heimsins er fluttur um sundið í venjulegu árferði.
Ómanar og Íranar ræddu um framtíð Hormússunds
Esmaeil Baghaei, talsmaður íranska utanríksiráðuneysins, segir embættismenn frá Óman hafa heimsótt Tehran um helgina til að ræða um framtíð Hormússunds, en það skilur ríkin tvö að. Ómanar hafa reglulega verið í hlutverki milligöngumanna í viðræðum Írans og Bandaríkjanna.
„Viðræðurnar voru gagnlegar og skiluðu jákvæðri framþróun,“ sagði Baghaei við íranska ríkismiðla án þess að lýsa viðræðunum frekar.
