Ingibjörg Davíðsdóttir, þingmaður Miðflokksins, sakar fréttamiðlana Heimildina og DV um útúrsnúninga og fréttafölsun eftir umfjöllun þeirra um ummæli hennar um samskipti Íslands við Bandaríkin og mögulega aðild að Evrópusambandinu.
Ingibjörg segir miðlana leggja sér orð í munn með því að halda því fram að hún vilji bera aðild Íslands að ESB undir Bandaríkin.
„Þessu hef ég aldrei haldið fram enda ekki þessarar skoðunar og þeir sem horfa eða hlusta á upptökuna sem vísað er til og má finna á miðlum Miðflokksins, heyra mig ekki halda þessu fram,“ skrifar Ingibjörg.
Tilefnið er meðal annars frétt Heimildarinnar sem bar fyrirsögnina „Vill bera aðild Íslands að ESB undir Bandaríkin“ og umfjöllun DV í kjölfarið.
Sagði stjórnvöld hafa vanrækt samskiptin við Bandaríkin
Í upptökunni sem um ræðir gagnrýndi Ingibjörg íslensk stjórnvöld fyrir samskipti þeirra við Bandaríkin og sagði að ræða hefði átt um möguleg áhrif aðildar Íslands að ESB á varnarsamning ríkjanna.
„Því miður hafa íslensk stjórnvöld vanrækt samskipti sín við Bandaríkin. Og það er mjög miður að þau hafi ekki sest niður með Bandaríkjunum, meðal annars til þess að ræða til dæmis hvað gerist með varnarsamning Íslands ef Ísland ákveður að ganga í Evrópusambandið,“ sagði Ingibjörg.
Ummælin vöktu hörð viðbrögð og Sigmar Guðmundsson, þingflokksformaður Viðreisnar, spurði meðal annars hvort þetta væri fullveldisást Miðflokksins.
„Að Ísland fari á hnjánum til Trump til að fá leyfi til að taka ákvörðun um framtíð lands og þjóðar?“ skrifaði Sigmar.
Hann sagði þingmenn Miðflokksins hafa greitt atkvæði gegn því að Íslendingar yrðu spurðir um ESB en vildu þess í stað „frekar spyrja Trump“.
„Langur vegur frá að Evrópa geti varið sig sjálf“
Ingibjörg hafnar því alfarið að hún hafi verið að kalla eftir leyfi Bandaríkjanna fyrir sjálfstæðum ákvörðunum Íslands.
Hún segir afstöðu sína snúa að öryggis- og varnarmálum Íslands og mikilvægi varnarsamstarfsins við Bandaríkin.
„Bandaríkin og varnarsamningur okkar skipta Ísland máli og reglulegt samtal við þessa vinaþjóð okkar tel ég af hinu góða og mikilvæga, rétt eins og við aðrar samstarfsþjóðir okkar.“
Hún segir slíkt samtal hins vegar alls ekki fela í sér að bera sjálfstæðar ákvarðanir Íslands undir önnur ríki.
Ingibjörg segir jafnframt að Evrópusambandið búi hvorki yfir sjálfstæðri varnargetu né þeim hernaðarlegu innviðum sem þurfi til að tryggja varnir Íslands án stuðnings Bandaríkjanna.
„Það er langur vegur frá að Evrópa geti varið sig sjálf. Ég tel ESB bæta engu við hvað öryggi og varnir Íslands varðar, enda tollabandalag en ekki varnarbandalag.“
Sakar Sigmar um að taka þátt í upplýsingaóreiðu
Ingibjörg gengur lengra og segir umfjöllun Heimildarinnar og DV vera til þess fallna að dreifa ósannindum um þá sem eru andvígir aðildarviðræðum við Evrópusambandið.
„Slíkt kalla ég útúrsnúninga og falsfréttir.“
Hún segir fréttaflutninginn sérstaklega alvarlegan í aðdraganda þjóðaratkvæðagreiðslunnar 29. ágúst og segir slíka umfjöllun hvorki trúverðuga né góða fréttamennsku.
Þá gagnrýnir hún Sigmar sérstaklega fyrir að deila umfjölluninni og bæta við gagnrýni sinni.
„Hér tekur þingflokksformaður Viðreisnar virkan þátt í upplýsingaóreiðu í aðdraganda þjóðaratkvæðagreiðslunnar,“ segir Ingibjörg.
