Hvernig skapa má hagkerfi velsældar – sem nærir umfram vöxt
Vöxtur hagkerfisins er ekki alltaf til góðs. Hagvaxtarsóknin og auðsöfnun vegna auðlindanýtingar hefur komið ástandi jarðar í það horf að sjö af níu þolmörkum hafa nú verið brotin. Huga þarf hratt að því að skapa nýja endurnærandi möguleika fyrir velsæld umfram takmörk hagvaxtarins.
Hagvöxtur hefur almennt verið talin forsenda framþróunar og undirstaða velferðarsamfélaga. Því með vextinum skapist forsendur fyrir því að byggja upp samfélagslegar stofnanir sem mynda velferð og hagsæld. Þessi sýn á hagvöxt og gildi hans breytist hratt nú um stundir.
Hagkerfið er hvorki skepna né sjálfstýrð vél – heldur manngert kerfi sem stjórnast af fólki. Kerfið byggir auðvitað á auðlindum, en einnig á hugviti, tækjum og vinnuafli. Veðurfarið eða veirur geta vissulega haft veruleg áhrif á hagkerfið eins og við vitum, en einnig menntun, lýðræði, menning og nýsköpun, svo nokkrir áhrifaþættir séu nefndir. Oft vill gleymast að hagkerfið er kerfi sem er búið til af okkur mannfólkinu. Dýrin og plönturnar láta sig það kerfi ekki neinu varða. En við nýtum sum þeirra fyrir aðföng inn í hluta af kerfinu. Auðlindirnar nýtast til að skapa hagvöxt en spurningarnar sem sækja nú á víðast hvar varða nýtingu auðlinda, hvernig þær eru nýttar og …
