Fyrstu tveimur langreyðum hvalveiðitímabilsins var landað í nótt og er von á þeirri þriðju til löndunar í kvöld. Fjarskiptamiðstöð ríkislögreglustjóra barst símtal í nótt, þar sem hótað var að sprengja annað hvalveiðiskipið ef hvalveiðum yrði framhaldið.
Hótuðu að sprengja annað hvalveiðiskipið
Hvalveiðiskipið Hvalur 9 landaði langreyðunum tveimur á fimmta tímanum í nótt og sigldi svo aftur út til veiða. Hvalur 8 er svo væntanlegur að landi um klukkan átta í kvöld með eina langreyði sem var skotin í gær.
Fjarskiptamiðstöð ríkislögreglustjóra barst sprengjuhótun í gegnum Neyðarlínuna um klukkan fjögur í nótt. Þar var tilkynnt að búið væri að koma fyrir einhvers konar sprengjubúnaði um borð í öðru skipinu og því hótað - að hann yrði virkjaður ef hvalveiðum yrði framhaldið. Fréttastofu RÚV barst sama hótun í morgun með tölvupósti.
Ásmundur Kristinn Ásmundsson, yfirlögregluþjónn hjá lögreglunni á Vesturlandi, staðfestir þetta. Hann segir forsvarsmann Hvals hf. hafa verið látinn vita og að málið sé í rannsókn. Hótunin hafi borist frá Bretlandi – en verið sé að rannsaka nákvæma staðsetningu.
Ásmundur segir símtalið metið sem ótrúverðuga hótun, en ráðstafanir hafi verið gerðar. Hann segist ekki geta tjáð sig um hvaða ráðstafanir það séu.
„Þetta skiptir okkur öll máli“
Hvalveiðiheimild í ár eru 150 langreyðar, sem er 20% lækkun frá fyrri ráðgjöf.
Vilhjálmur Birgisson, formaður Verkalýðsfélags Akraness, segir fagnaðarefni að hvalveiðivertíðin sé farin af stað á ný.
„Þær skipta okkur Akranesinga og nærsveitir miklu máli. Tekjumöguleikar þeirra sem þarna starfa eru umtalsverðir, einfaldlega vegna þess að þarna er unnið allan sólarhringinn,“ segir Vilhjálmur.
Vel á annað hundrað starfsmenn séu við störf á tímabilinu.
„Þetta mun skila Akraneskaupstað tugum milljóna í útsvarstekjur, þetta mun skila ríkissjóði skatttekjum sem hjálpar okkur síðan við að halda heilbrigðiskerfinu, menntakerfinu og svo framvegis. Þetta skiptir okkur öll máli. Það skiptir okkur máli að við nýtum okkar auðlindir sem við eigum.“
Málflutningur dýraverndarsamtaka óskiljanlegur
Dýra- og náttúruverndarsamtök hafa gagnrýnt veiðarnar og segja þær ómannúðlegar og tilgangslausar út frá viðskiptahagsmunum. Vilhjálmur segist ekki geta skilið þennan málflutning.
„Ekki frekar en árið 2009 þegar það var talað um það, þegar veiðarnar voru heimilaðar á nýjan leik, að hér myndu ferðamenn hætta að koma til landsins og alls kyns dómsdagsspár voru þá uppi. Ekkert af þessu rættist.“
Óskaði eftir aðstoð lögreglu við hvalstöðina í nótt
Um tíu manns höfðu komið sér fyrir fyrir utan girðingar hvalstöðvarinnar í nótt þegar Hvalur 9 var á leið í land. Kristján Loftsson, eigandi Hvals hf., óskaði eftir aðstoð lögreglu, skyldi eitthvað koma upp á.
Samkvæmt upplýsingum frá lögreglunni á Vesturlandi komu þeir á staðinn um fjögur. Friðsamlegt hafi verið við hvalstöðina.
„Þar var lítill hópur fólks sem var hér til að horfa, fólk sem var hér til að taka upp. Fólk sem vissi kannski hvað var í gangi, fremur en ferðamenn sem voru á leið fram hjá,“ segir Imogen Sawyer, aðgerðarsinni hjá Paul Watson-samtökunum. Hún var ein þeirra sem fylgdist með þegar Hvalur 9 kom inn til löndunar.
Imogen segir að viðvera samtakanna hér á landi sé ekki til að mótmæla, heldur til að mynda veiðarnar og verkunina, og tilkynna til lögreglu verði þau vör við hugsanlegt lögbrot.
„Við verðum á Íslandi þangað til Kristján Loftsson, þangað til Hvalur hættir hvalveiðum. Við erum hér til að binda endi á það.“
