Utanríkisráðherra segir að engum hefði átt að koma á óvart að þingsályktunartillaga hennar um þjóðaratkvæðagreiðslu um aðildarviðræður að ESB hafi verið afgreidd úr utanríkismálanefnd í morgun. Legið hafi fyrir að málið yrði afgreitt á þessu þingi. Sigmundur Davíð Gunnlaugsson formaður Miðflokksins segir þetta síður en svo hafa verið tímabært.
„Það er bara allt upp í loft,“ segir Sigmundur Davíð eftir að málið fór úr nefnd.
Farið í leikjabókina
„Þessar raddir úr stjórnarandstöðunni eru bara gamalkunnar - þau fara í leikjabókina og þar eru tafaleikir og verið að reyna að setja einhvern tortryggnisblæ á þetta,“ segir Þorgerður Katrín Gunnarsdóttir utanríkisráðherra.
Eftir að hafa verið afgreidd úr nefndinni fer þingsályktunartillagan til annarrar umræðu á Alþingi og síðan í atkvæðagreiðslu. Henni þarf að vera lokið fyrir 29. maí - þremur mánuðum áður en þjóðaratkvæðagreiðslan er fyrirhuguð.
Utanríkisráðherra hefur litlar áhyggjur af því að það sé knappur tími. „Það er yfirdrifið nægur tími í þinginu miðað við reynsluna,“ segir hún.
Bannað að hafa samband við ESB
Fulltrúar minnihlutans í nefndinni segjast ítrekað hafa beðið um ýmis gögn sem tengjast málinu en ekki fengið. „Eitthvað máttum við skoða í leyniherbergi ef við lofuðum að segja engum frá hvað kæmi fram í gögnunum,“ segir Sigmundur Davíð.
Ríkisstjórnin aflétti í gær trúnaði á fundargerðum varðandi aðildarviðræðurnar 2009 - '13. Sigmundur Davíð segir þær mikilvægar til að átta sig á hvað gæti gerst, yrði farið í aðildarviðræður að nýju. Hann segir að Feneyjanefndin hafi ráðlagt utanríkismálanefnd að kanna hvernig ESB myndi bregðast við yrði samþykkt að fara í viðræður.
„En okkur er bannað að hafa samband við Evrópusambandið nefndin vill ekki, meirihluti hennar fá upplýsingar frá ESB. Og það segir sína sögu.“
Getur þú ekki bara haft samband við Evrópusambandið og spurt? „Jú, ég get reynt það, en það getur líka hvaða borgari sem er reynt að hringja til Brussel. Gangi þeim vel með það,“ segir Sigmundur.
Segir að málþóf væri skrýtið
Í áliti meirihluta utanríkismálanefndar er lagt til að breyta orðalagi spurningarinnar í atkvæðagreiðslunni þannig að í stað þess að spyrja hvort halda eigi áfram viðræðum, verði spurt hvort hefja eigi þær á ný. „Þetta er bara enn ein áminningin um að það var farið af stað með þetta á fölskum forsendum, röngum forsendum og að vanhugsuðu máli,“ segir Sigmundur Davíð um þessa breytingu.
Spurð hvort hún eigi von á málþófi þegar málið fer á dagskrá Alþingis segir Þorgerður Katrín að það væri skrýtið, ef það gerðist. „Þá er það eitthvað hagsmunamat sem ég næ ekki. Mér finnst skrýtið ef stjórnarandstaðan ætlar í málþóf út af máli sem snýst um að þjóðin komi að því.“
„Við höfum ekki tíma fyrir málþóf en við munum þurfa að ræða þetta mjög ítarlega, ég efast ekkert um það,“ segir Sigmundur Davíð.
