„Við höfum auðvitað lengi haft miklar áhyggjur af fjárhag borgarinnar og kannski einfaldasta leiðin til að skýra stöðuna er að hér hafa menn um árabil verið að eyða um efni fram,“ segir Hildur Björnsdóttir, oddviti Sjálfstæðisflokksins, um ársreikning Reykjavíkurborgar fyrir árið 2025 sem birtur var í dag.
Rekstur A-hluta Reykjavíkurborgar var neikvæður um rúmlega 5 milljarða króna fyrir árið 2025. Þegar A- og B-hluti borgarinnar eru skoðaðir saman var reksturinn árið 2025 jákvæður um átta milljarða króna, sem er um 2,7 milljörðum krónum lakari niðurstaða en 2024.
„Fókusinn hefur verið á röngum stað, það hefur verið fókus á gæluverkefni og aukaverkefni og minni fókus á grunnþjónustuna, að veita borgurunum góða og öfluga þjónustu, og það er þetta sem við þurfum að snúa við,“ segir Hildur.
Flokkurinn hefur mælst stærstur í tveimur síðustu skoðanakönnunum. Aðspurð hvort Sjálfstæðisflokkurinn stefni á niðurskurð á þjónustu í A-hlutanum komist hann í meirihluta eftir kosningar segir Hildur ekki koma til greina að skera niður í grunnþjónustu.
„En það þarf að hafa kjark til að stíga stór skref í átt að því að bæta reksturinn, það þarf að minnka yfirbygginguna, fækka millistjórnendum og ráðast í úttekt á öllu kerfinu og þeim tækifærum sem eru í boði til þess að skera niður,“ segir Hildur.
Einnig var rætt við Heiðu Björgu Hilmisdóttur borgarstjóra. Hún sagði fyrr í dag að ársreikningurinn gæfi ekki rétta mynd af rekstri borgarinnar.
„Fyrst og fremst eru það þessar lífeyrissjóðsskuldbindingar sem eru reiknuð stærð sem tekur mið af því hvernig gengur að ávaxta á markaði, launahækkunum og öðru slíku,“ segir Heiða. Þá komi lífeyrissjóðsskuldbindingar alltaf seint inn í ársreikninginn og því sé erfitt að gera ráð fyrir þeim.
„Þetta var mun hærri gjaldfærsla en við höfum áður séð, allavega síðustu ár hér og gátum engan veginn áætlað fyrir, segir Heiða sem tekur fram að ávöxtun hjá lífeyrissjóðnum Brú hafi einnig verið slök.
„Það segir kannski mikið um markaðinn, það hefur verið mikil verðbólga og það hefur ekki gengið vel og við vonum bara að efnahagurinn nái sér og þá gangi þetta vonandi til baka,“ segir hún.
