Íbúum í suðaustur Noregi brá þegar jarðskjálfti 3,3 að stærð varð í morgun. Íslendingur sem býr í Noregi vaknaði við þungt högg og hélt að um sprengningu væri að ræða.
„Þetta var svolítið óvænt, maður býst ekki beint við jarðskjálftum í Noregi eða í Osló og ég vaknaði við þetta, þetta kom bara svona pínu eins og högg, svona eins og það hefði verið sprenging eða eitthvað,“ segir Karitas Mörtudóttir Bjarkardóttir sem var í vesturhluta Oslóborgar þegar skjálftinn reið yfir. Hún segist ekki hafa áttað sig á því í fyrstu að um jarðskjálfta væri að ræða.
„Ég vaknaði við þetta og unnusti minn segir: Þetta hlýtur bara að hafa verið stór lest. Hann lýsir því að hafa fundið svona pínu titring áður en að höggið kom. Við erum hérna rétt við lestarstöð þannig að hann gerði bara ráð fyrir að þetta væri einhver risastór flutningalest.“
Og fannst þér þetta svolítið öðruvísi upplifun en þegar það verða skjálftar á Íslandi?
„Já mér fannst hann styttri og húsið bara lék allt á reiðiskjálfi í stuttan tíma. Eins og ég sagði áttaði maður sig ekki á því að þetta gæti verið jarðskjálfti.“
Djúp, mjúk jarðlög magna upp hristinginn
Mikið hefur verið fjallað um skjálftann í norskum fjölmiðlum. Benedikt Halldórsson, fagstjóri jarðskjálftavár á Veðurstofu Íslands, segir jarðskjálfta ekki algenga í Noregi.
„Þessi virðist hafa verið þarna norðaustur af Osló og miðað við það hvernig skjálftavirkni er í Noregi, þótt að þetta sé svokallað innflekasvæði á meðan að við hérna á Íslandi erum á flekaskilum tveggja jarðskorpafleka, þá liggur Noregur algjörlega inni í flekanum og þar gerist öll jarðfræði bara miklu hægar en hér.“
En hvers vegna virðast Norðmenn hafa fundið meira fyrir þessum skjálfta en við á Íslandi þegar skjálftar svipaðir á stærð ríða yfir?
„Eitt sem þeir hafa sem við höfum kannski ekki eru svona djúp, mjúk jarðlög og slík jarðlög geta oft magnað upp hristinginn þannig að hann virkar meiri en stærð skjálftans hefði getað valdið, segir Benedikt. “
Ætli þetta sé einstakur skjálfti eða er þetta sé hluti af einhverjum frekari skjálftum?
„Það er ómögulegt að segja en það vakti samt athygli mína að það var pínulítill skjálfti um einn að stærð þarna rétt hjá þessum fyrir fimm dögum síðan. Hvort það er tilviljun eða ekki það verður bara að koma í ljós.“
