Skemmtiferðaskipið Hondius, þar sem farþegar smituðust af hantaveiru, kom til hafnar í Rotterdam í Hollandi í morgun. Um 120 farþegar voru fluttir af skipinu til Tenerife fyrir viku og þaðan ýmist til heimalands síns eða á sjúkrahús.
Aðeins 25 manna áhöfn og tveir læknar voru um borð þegar skipið kom til Rotterdam. Sumir sáust með bláa hjálma og grímur fyrir vitunum þegar lagðist að bryggju. Lík þýskrar konu sem var farþegi á skipinu og lést úr veirunni var einnig um borð.
Skipið hélt frá Argentínu í byrjun apríl og átti að ljúka ferð sinni á Grænhöfðaeyjum. Fyrstu tilfellin greindus á leið þangað í byrjun maí. Yfirvöld á Grænhöfðaeyjum neituðu að taka við farþegunum. Spænsk stjórnvöld samþykktu þá að skipið kæmi til Tenerife, þar sem farþegarnir yrðu fluttir til síns heima, eða til Hollands, með flugi. Mikil andstaða yfirvalda á Kanaríeyjum kom ekki í veg fyrir að farþegarnir væru fluttir þessa leið.
Kanadískur farþegi greindist um helgina
Alls eru sjö staðfest tilfelli og sterkur grunur um eitt til viðbótar. Þrír hinna smituðu eru látnir. Tveir farþegar, annar hollenskur en hinn breskur, voru fluttir í skyndi á sjúkrahús í Hollandi frá Tenerife alvarlega veikir en ástand beggja er nú stöðugt. Bretinn getur meira að segja ferðast til síns heima þar sem hann verður í einangrun. 65 ára frönsk kona sýndi einkenni á leið frá Tenerife til Frakklands og endaði fárveik á sjúkrahúsi í París þar sem hantaveirusmit var staðfest. Þá var á laugardag tilkynnt um að kanadískur farþegi væri smitaður. Alþjóðaheilbrigðisstofnunin sagðist í gær bíða frekari upplýsinga um hann.
Hollensk yfirvöld segja að enginn annar farþegi hafi sýnt einkenni hantaveirusmits og það sama eigi við um þá úr áhöfninni sem voru á skipinu þegar það lagðist að bryggju í morgun.
Alþjóðaheilbrigðisstofnunin ítrekaði í gær það mat sitt að lítil hætta væri á að faraldur brytist út vegna veirunnar. Þó tók stofnunin fram að ný tilfelli gætu greinst meðal farþega og áhafna sem komust í snertingu við smitað fólk áður en gripið var til ráðstafana í skipinu.
Bæði farþegar og áhöfn verða í einangrun í allt að sex vikur, flestir heima hjá sér en hluti áhafnarinnar dvelur í sérstakri sóttkví í höfninni. Skipið verður þrifið og sótthreinsað kyrfilega.
