Heildarhagnaður viðskiptabankanna þriggja; Arion banka, Íslandsbanka og Landsbankans, ásamt Kviku banka var alls 27,8 milljarðar króna á fyrsta ársfjórðungi 2026.
Hagnaðurinn jókst um 7,6 milljarða eða tæplega 32%.
Alls nam hagnaður bankanna fjögurra 20,2 milljörðum króna á sama tíma í fyrra.
Hreinar vaxtatekjur bankanna, það er munurinn á vaxtatekjum og gjöldum, jukust um 14,4 milljarða króna og voru alls 57,3 milljarðar á fyrsta ársfjórðungi 2026.
Þær voru alls 42,9 milljarðar á sama tíma fyrir ári síðan. Það samsvarar tæplega 29% aukningu á hreinum vaxtatekjum.
Kvika tvöfaldar hagnað sinn
Kvika banki skilaði uppgjöri sínu í gær en bankinn hagnaðist um 1,8 milljarða króna á fyrsta ársfjórðungi. Það er meira en tvöföldun á hagnaði frá því á sama tíma fyrir ári síðan þegar hagnaður var 701 milljón króna. Þrátt fyrir að hagnaður bankans sé talsvert lægri í krónum talið en hjá hinum bönkunum er hann hlutfallslega mestur.
Ármann Þorvaldsson, forstjóri Kviku, segir í tilkynningu að rekstur hafi verið góður á ársfjórðungnum og að vaxtatekjur bankans haldi áfram að aukast. Þær jukust alls um 349 milljónir.
Skömmu eftir lok fjórðungsins var tilkynnt að hætt hefði verið við samrunaviðræður Kviku og Arion banka eftir forviðræður við Samkeppniseftirlitið.
Ármann segir að haldið verði áfram með þau markmið sem bankinn lagði upp með fyrir tveimur árum og vonast bankinn til að skila rúmlega 40 milljörðum króna til hluthafa á tveimur árum.
Landsbankinn hagnaðist mest stóru bankanna
Landsbankinn hagnaðist mest af viðskiptabönkunum þremur en hagnaður Landsbankans á fyrsta ársfjórðungi nam 11,2 milljörðum króna eftir skatta, samanborið við 7,9 milljarða á sama tíma í fyrra, sem er aukning um 3,3 milljarða.
Aukning á hreinum vaxtatekjum var þá einnig mest hjá bankanum en þær jukust um 5,8 milljarða, úr 14,8 milljörðum á fyrsta ársfjórðungi 2025 í 20,6 milljarða á fyrsta ársfjórðungi 2026.
Lilja Björk Einarsdóttir, bankastjóri Landsbankans, segir uppgjör ársfjórðungsins sterkt fyrir alla þætti bankans. Arðsemi eiginfjár hafi verið 13,5% sem sé umfram áætlun sem skýrist af því að verðbólga hafi verið hærri en gert var ráð fyrir.
Hagnaður Íslandsbanka meiri en gert var ráð fyrir
Íslandsbanki hagnaðist um 7,5 milljarða á fyrsta ársfjórðungi 2026. Á fyrsta ársfjórðungi 2025 var hagnaður 5,2 milljarðar króna. Hagnaður jókst því um 2,3 milljarða milli ára.
Hreinar vaxtatekjur bankans voru 17,1 milljarður núna miðað við 14,8 milljarða á fyrsta ársfjórðungi 2025.
Jón Guðni Ómarsson, bankastjóri Íslandsbanka, segir að bæði hagnaður og arðsemi eigin fjár hafi verið yfir spám greinenda fyrir þennan fjórðung. Hann segir að aukning í vaxtatekjum bankans, sem voru 11% yfir spám greinenda, sé helsta skýringin á auknum hagnaði. Bankinn sagði upp um 50 starfsmönnum í síðasta mánuði og er gert ráð fyrir að með því sparist um einn milljarður króna í launakostnað á ári.
Nýtt skipulag á að einfalda stjórnskipulag og stytta boðleiðir, samkvæmt tilkynningu bankans. Þær eiga að styrkja bankann þar sem stafræn þróun, aukin nýting gervigreindar og breyttar kröfur viðskiptavina kalli á nýja nálgun í rekstri og þjónustu.
Eftirspurn eftir verðtryggðum lánum jókst hjá Arion
Hagnaður Arion banka var 7,3 á fyrsta ársfjórðungi 2026 miðað við 6,4 milljarða á sama tíma í fyrra. Hreinar vaxtatekjur bankans voru alls 16,3 milljarðar króna miðað við 12,2 milljarða á sama tíma í fyrra og jukust þannig um 4 milljarða.
Benedikt Gíslason, bankastjóri Arion banka, segir afkomu bankans í samræmi við væntingar og markmið. Hann segir að vegna hárra vaxta hafi undanfarin misseri verið mikil eftirspurn eftir verðtryggðum íbúðalánum og að vöxtur hafi verið á lánum til einstaklinga á þessum ársfjórðungi.
„Fyrir bankann fylgir sá ókostur verðtryggðum íbúðalánum að þau eru að miklu leyti fjármögnuð með óverðtryggðum hætti, til dæmis í gegnum innlán viðskiptavina. Það leiðir til ójöfnuðar í efnahag bankans, þar sem verðtryggðar eignir eru umtalsvert meiri en verðtryggðar skuldir, og sveiflna í tekjum í takt við verðbólgu og verðbætur,“ segir Benedikt í tilkynningu.
