Stjórnmálamaðurinn með ruslatunnu á höfðinu hefur verið mikið í umræðunni eftir að hann lýsti því yfir að hann ætlaði að bjóða sig fram gegn Nigel Farage, leiðtoga Umbótaflokksins, í aukakosningum. Fötufésið er þó enginn ný græðingur í framboðum - hefur meðal annars þrisvar boðið sig fram gegn sitjandi forsætisráðherra.
Sú ráðstöfun Nigel Farage að segja af sér þingmennsku í kjördæmi sínu á þriðjudag til þess eins að bjóða sig fram aftur í sérstökum kosningum er að snúast upp í fáránleika. Stærstu flokkar Bretlands neituðu að stilla upp frambjóðendum á móti honum og nú er útlit fyrir að sá eini sem bjóði sig fram á móti honum sé grínisti í gervi stjórnmálamanns sem kemur aðeins fram með gráa ruslatunnu á hausnum. En hver er maðurinn á bak við hann?
Maðurinn á bak við Fötufés greifa (Count Binface) er breski grínistinn Jon Harvey. Hann byrjaði ferilinn sem handritshöfundur á sjónvarpsþáttum á borð við The Thick of It og Have I Got News for You.
Hann hóf afskipti af stjórnmálum árið 2017 þegar hann bauð sig fram gegn þáverandi forsætisráðherra, Theresu May, í kjördæminu Maidenhead sem persóna ekki ósvipuð fötufésinu, Lord Buckethead. Þar klæddist hann svartri skikkju utan yfir geimbúningi og svörtum hjálmi. Fyrirmyndin var sótt í myndina Hyperspace frá 1984 þar sem aðallega var verið að gera grín að Stjörnustríðsmyndunum. Buckethead var illmennið í þeirri mynd.
Burnham tryggði sér réttinn á persónunni
Eftir þessar kosningar hafði Andy Burnham, sem brátt verður forsætisráðherra Bretlands, samband við Harvey og vildi semja um eignarhald á þessari persónu. Það varð úr og Durham réð annan leikara til að taka við þessu hlutverki. Í staðinn bjó Harvey til persónuna sem nú er á allra vörum. Fötufés er lýst sem hátt í 6.000 ára gömlum hermanni úr öðru sólkerfi. Einkennisklæðnaðurinn er svartur og grár búningur, silfurlituð skikkja og hjálmur í laginu eins og ruslatunna. Í stað augna er gljáandi rönd. Hann segist leiðtogi endurvinnslufólks frá plánetunni Sigma IX.
Fötufés bauð sig fyrst fram í þingkosningunum 2019, gegn Boris Johnson þáverandi forsætisráðherra. Meðal stefnumála hans var að endurvekja telexið, þjóðnýta Adele, frítt háhraðanet fyrir alla, gera sjónvarpsmanninn Piers Morgan kolefnishlutlausan fyrir árið 2030 og að halda þjóðaratkvæðagreiðslu um hvort halda eigi aðra þjóðaratkvæðagreiðslu um hvort Bretar eigi að ganga aftur inn í Evrópusambandið. Flest af þessum og fleiri stefnumálum voru líka notuð í framboði hans í þingkosningunum 2024 þegar hann bauð sig fram gegn Rishi Sunak þáverandi forsætisráðherra. Fötufésið hefur því boðið sig fram gegn þremur sitjandi forsætisráðherrum.
Fötufés hefur einnig tvisvar boðið sig fram í borgarstjórnarkosningunum í Lundúnum. Meðal stefnumála hans þar voru að Lundúnir gengju í Evrópusambandið, banna hávært snakk í leikhúsum og hætta með VAR í fótbolta. Þá vildi hann að bannað yrði að nota hátalara í farsímum á almannafæri og að þeir sem yrðu staðnir að verki við þá iðju væru neyddir til að horfa á bíómyndina Cats daglega í heilt ár.
Í 7. sæti í aukakosningum
Það hefur verið nóg að gera hjá fötufésinu undanfarnar vikur. Hann bauð sig fram í aukakosningunum í kjördæminu Makerfield sem fóru fram 18. júní. Þær voru haldnar eftir að John Simmons þingmaður Verkamannaflokksins sagði af sér í þeim tilgangi að hleypa Andy Burnham, þá borgarstjóra Manchester, inn á þing og með því greiða götu hans að leiðtogasæti Verkamannaflokksins. Fötufésið hafnaði í 7. sæti af 14 frambjóðendum með 95 atkvæði, eða 0,2% atkvæða. Eitt af stefnumálum hans var að neyða þá hjólreiðamenn sem brjóta umferðarreglur til að ferðast um á einhjólum.
Í viðtali í Wigan eftir að Andy Burnham hafði verið kynntur sem sigurvegari kosninganna var Fötufés spurður hvort hann byggi í kjördæminu. Hann svaraði: „Í kvöld geri ég það.“ Þegar hann fékk fréttamanninn til að segja að hann byggi ekki í kjördæminu segir Fötufésið: „Af hverju ætti ég þá að gera það?“ Og þegar haft var á orði að hann legði greinilega enga áherslu á búsetuna eins og margir aðrir þingmenn gera svaraði hinn sjálfskipaði greifi að bragði: „[Nigel Farage] eyðir meiri tíma í Bandaríkjunum en í Clacton, af hverju ætti ég þá að hafa áhyggjur af því?“
Nigel Farage tilkynnti um afsögn sína á þriðjudag vegna fréttaflutnings um að hann hefði ekki gefið fjárstyrki og gjafir upp sem slíkar. Farage tilkynnti jafnframt að hann myndi sjálfur bjóða sig fram í aukakosningunum í Clacton-kjördæminu. Aðrir flokkar sögðu þetta örvæntingarfullt bellibragð hjá Farage og neituðu að taka þátt í því. Þá steig Fötufésið fram. „Ég verið frambjóðandi sameiningar og heiti því að byggja að minnsta kosti eitt hús á viðráðanlegu verði,“ sagði hann í færslu á X og bætti við varðandi Farage: „Látið mig um hann.“
Pólitískum andstæðingum Farage er mjög skemmt yfir því að þetta útspil Farage sé að snúast í höndunum á honum. „Ef hann [Farage] vill nota sumarið í að rífast við ruslatunnu ætla ég ekki að stoppa hann,“ sagði Rachel Reeves fjármálaráðherra Bretlands á X.
Fötufésið hefur opinberlega sagt að það sé ólíklegt að hann vinni þessar kosningar. En könnun sem fyrirtækið Ipsos gerði, og The Independent greinir frá, gefur til kynna að 33% fullorðinna Breta vilji að Fötufésið vinni þessar kosningar, meðan aðeins 21% styður Farage. 32% vilja hvorugan þeirra. Hér skal þó tekið fram að það eru íbúar í Clacton-kjördæmi sem ráða úrslitum um þetta þingsæti, ekki öll breska þjóðin.
Mánuður er í kosningarnar um þingsætið. Fram að því þurfa Fötufésið og Nigel Farage að mæta í kappræður á ýmsum stöðum. Skemmtanagildið verður ótvírætt en hvaða áhrif þessi atburðarrás hefur á stjórnmálin í Bretlandi verður að koma í ljós.
