Aðstoðaryfirlögregluþjónn hjá lögreglunni á Norðurlandi eystra segir að mál er varðar grun um vopnaburð á Akureyri í gær sé enn til rannsóknar. Fimm drengir um tvítugt voru handteknir í aðgerð lögreglu eftir að henni barst tilkynning um skotvopnaburð. Í ljós kom að um leikfangabyssur var að ræða.
„Sannarlega verður þessu máli fylgt eftir. Þarna er fólki ógnað þrátt fyrir að ekki sé um raunveruleg vopn að ræða. Fólki stendur ógn af verkfæri sem lítur alveg eins út eins og vopn. Þetta er hegðun sem er langt frá því að vera eðlileg og ekki síst náttúrlega innan um mannfjölda sem ekki þekkir til. Þó að eitthvað virki sem grín og skemmtilegheit í einhverjum þröngum hópi þá er það það ekki í svona aðstæðum,“ segir Hjalti Bergmann Axelsson aðstoðaryfirlögregluþjónn á Norðurlandi eystra.
Hjalti segir ekki útilokað að drengirnir verði kærðir fyrir vopnalagabrot.
„Þeir hlýddu öllum fyrirmælum og voru mjög samstarfsfúsir“
Lögreglunni á Akureyri barst tilkynning um einstaklinga á tveimur bílum með skotvopn í fórum sínum um klukkan 13:40 í gær. Í kjölfarið var sérsveit ríkislögreglustjóra kölluð inn og leit hafin að bílunum sem fundust mannlausir í miðbæ Akureyrar, nærri hátíðarsvæði Einnar með öllu.
Eftir að drengirnir, sem voru fimm talsins og um tvítugt, komu í bílana og keyrðu af stað um 14:50 veitti lögregla þeim eftirför.
„Svo kemur í ljós, þegar verið er að fara á eftir þeim, að þeir eru að veifa einhvers konar vopni út úr ökutækjunum, eða allavega öðru þeirra, og beina því að vegfarendum þarna í kring. Eftir að ástandið er tryggt kemur í ljós að þetta eru eftirlíkingar af skotvopnum, eða leikfangavopn, sem sést í rauninni ekki fyrr en að þeir eru komnir í okkar hendur.“
Þegar lögregla taldi æskilegt að stöðva bílana með öruggum hætti var það gert, um þrjúleytið. Drengirnir fimm voru allir handteknir og færðir á lögreglustöð. Þeir voru látnir lausir í gærkvöldi að skýrslutöku lokinni.
„Þeir hlýddu öllum fyrirmælum og voru mjög samstarfsfúsir,“ segir Hjalti. Drengirnir hafi borið fyrir sér að hafa ekki áttað sig á alvarleika athæfis síns.
Er ástæða fyrir því að ekki var greint frá því í gær að um eftirlíkingar væri að ræða?
„Það er engin sérstök ástæða fyrir því. Þetta eru bara upplýsingar sem við vorum ekki að setja út. Við höfðum þessar upplýsingar í rauninni ekki fyrr en það var búið að ná utan um verkefnið.“
