Kristján Þór Kristjánsson, oddviti Framsóknar og óháðra, og Gylfi Ólafsson, oddviti Viðreisnar, hófu í dag formlegar viðræður um meirihlutasamstarf á Ísafirði. Frá þessu greindu þeir fyrir skömmu á Facebook:
Framsókn fékk bestu kosninguna í Ísafjarðarbæ og fjóra kjörna fulltrúa. Viðreisn náði aðeins oddvitanum inn, en með því ná flokkarnir tveir fimm manna meirihluta í sveitarstjórn.
Viðræðurnar segja oddvitarnir að standi væntanlega fram yfir helgi. Þeir Kristján og Gylfi þekkjast vel eftir að hafa unnið saman í sveitarstjórn undanfarin fjögur ár.
Kristján sagði í viðtali við BB.is að ekki hefði enn verið rætt um bæjarstjórastólinn, það yrði gert að loknum viðræðum um önnur mál.
Pétur Marteinsson var „settur í stöðu forystumanns Samfylkingarinnar í borginni sem flokksforystan á landsvísu hefur verið í stjórnarandstöðu gegn,“ segir Gauti B. Eggertsson, hagfræðiprófessor og bróðir Dags B. Eggertssonar, þingmanns Samfylkingarinnar og fyrrverandi borgarstjóra.
Hann birti færslu á Facebook-síðu sinni þar sem hann segir borgarstjórnarflokkinn hafa haldið lífi í Samfylkingunni síðustu 10 til 15 ár. Hópur örfárra flokksmanna hafi gleymt því.
„Og vinirnir veltu úr stalli eigin borgarstjóra. Í kjölfarið uppskáru þau versta fylgi í sögu flokksins í borginni. En mæta nú ábúðarfull í umræðuþætti og tala um valdþreytu og það þurfi að byggja upp “traust”. Kannanir sýndu að það var bara í fínu lagi í Janúar og Febrúar.“
Magnús Stefánsson lætur af störfum sem bæjarstjóri eftir 14 ára starfstíma, fyrst hjá Sveitarfélaginu Garði og síðar Suðurnesjabæ. Ráðningartíma hans lýkur um mánaðamótin. Víkurfréttir greindu fyrst frá.
„Framundan eru spennandi en jafnframt krefjandi verkefni sem bíða úrlausnar og vonandi gengur sem allra best að vinna úr þeim í þágu samfélagsins,“ sagði Magnús í færslu á Facebook-síðu sinni þar sem hann óskaði bæjarfulltrúum til hamingju með kjörið.
Samfylkingin bætti við sig einum fulltrúa í kosningunum á laugardag og er þá með þrjá meðan Sjálfstæðismenn misstu einn. Framsókn hélt sínum tveimur og Miðflokkurinn náði inn tveimur fulltrúum í Suðurnesjabæ.
Oddvitar L-listans, Sjálfstæðisflokks og Framsóknar halda spilunum þéttar að sér nú en dagana tvo á undan - og hafa ýmist beðist undan því að tala við fréttamenn eftir hádegi eða sagt engin tíðindi af viðræðum.
Oddvitarnir hafa verið brattir fram að þessu og Óðinn Svan Óðinsson, oddviti L-listans, talað um að mikið þurfi út á að bregða til þess að flokkarnir nái ekki saman.
Í gær ræddu þau við flokksmenn sína um stöðu viðræðna, svo þær virðast komnar þó nokkuð áleiðis.
Í Hveragerðisbæ eru oddvitar fjögurra flokka allir að ræða hver við annan og engar formlegar viðræður hafnar. Þetta sagði Ingimar Guðmundsson, oddviti Sjálfstæðismanna í Hveragerði, í spjalli nú rétt í þessu.
Staðan í þeirra sveitarfélagi sé þannig að ýmsir meirihlutar séu mögulegir, en Sjálfstæðisflokkurinn fékk þó bestu kosninguna þar, eða tæp 44% atkvæða.
„Það er stutt í að viðræður geti hafist formlega, við færumst nær,“ segir Ingimar. Þau vonast til að formlegar viðræður gætu hafist fyrir helgina.
Fátt er að frétta af myndun nýs meirihluta í borgarstjórn í Reykjavík. Hildur Björnsdóttir, oddviti Sjálfstæðisflokksins, hyggst nýta daginn í dag til að ræða við sitt fólk áður en næstu skref verða tekin.
Hildur ræddi í gær við alla oddvita þeirra flokka sem fengu kjörna fulltrúa heldur spilunum mjög þétt að sér.
Hún hefur sagt að hana langi til að klára að mynda nýjan meirihluta fyrir 3. júní en þá er borgarstjórnarfundur, svo það eru um það bil tvær vikur.
Ari Edwald, oddviti Miðflokksins sagði fréttastofu í morgun að það væri ekkert nýtt að frétta síðan í gær. Hann sagðist bara bíða rólegur eftir samtali frá Hildi varðandi framhaldið.
María Sigrún Hilmarsdóttir hefur legið í símanum í dag og reynt að ná tali af oddvitum. Hún fór yfir stöðuna í hádegisfréttum.
Guðmundur Ingi Þóroddsson, oddviti Flokks fólksins í Reykjavík, segir úrslit kosninganna hafa verið vonbrigði. Flokkurinn fékk 3,3% fylgi í kosningunum á laugardag og þurrkaðist út úr borgarstjórn.
„Það er auðvitað áhyggjuefni þegar rödd sem talað hefur sterkast fyrir málefnum eldri borgara, öryrkja og fólks sem stendur höllum fæti heyrist ekki lengur í borgarstjórn,“ segir í færslu Guðmundar Inga á Facebook.
„Þessi úrslit kalla á að við söfnum vopnum okkar, förum strax í að efla grasrótina, styrkja ungliðastarf og tryggja að flokkurinn verði með öflugt framboð um allt land. Baráttan heldur áfram.“
Alls greiddu 54,95% kosningabærra borgarbúa atkvæði í kjördeildum víðs vegar í Reykjavík á laugardag, 3,7% meira en í síðustu sveitarstjórnarkosningum 2022.
Kjörsókn var mest 67,17% í Fossvogsskóla og minnst 40,58% í Fjölbrautaskólanum í Breiðholti. Hún jókst mest í Rimaskóla milli sveitarstjórnarkosninga, eða um 7,35%, en dróst saman um 2,4% í Hagaskóla.
Þegar litið var til einstakra hverfa jókst hún einna mest í Grafarvogi og Grafarholti. Auk Rimaskóla var einnig 5,31% aukning í Foldaskóla og 6,03% aukning í Borgarskóla.
Oddvitar Sjálfstæðisflokksins og Framsóknarflokksins ræða áframhaldandi samstarf í Múlaþingi. Staða núverandi meirihluta sveitarstjórnar í Múlaþingi styrktist í sveitarstjórnarkosningum á laugardag.
Sjálfstæðisflokkurinn bætti við sig einum fulltrúa og er því með fjóra á meðan Framsókn hélt sínum þremur.
Viðræður ganga vel, segir Berglind Harpa Svavarsdóttir, oddviti Sjálfstæðisflokksins. Hún fundar þessa dagana með Jónínu Brynjólfsdóttur, oddvita Framsóknar.
Þær stefna á að vera komnar með meirihluta innan næstu tíu daga.
„Sem keppnismaður varð maður náttúrulega bara fúll svona strax á eftir, en svona raunhæft að líta á þetta og sætta sig við niðurstöðuna, þá er maður bara kominn núna í gírinn að undirbúa sig undir að vera með gott aðhald í minnihluta,“ segir Pétur Marteinsson, oddviti Samfylkingarinnar í Reykjavík.
Samfylkingin hafi bætt við sig fulltrúum á landsvísu og sé því í sterkri stöðu.
„Í Reykjavík höldum við okkar fimm borgarfulltrúum, sem hefur ekki verið trendið síðustu kosningar, við höfum venjulega verið að missa alltaf einn. Miðað við kjörtímabilið sem er að ljúka og kosningabaráttuna, það sem ég fann alveg að það væri brekka og mótvindur, þá held ég að við getum bara vel við unað.“
„Hins vegar var maður með önnur markmið. Markmiðið var að fá inn sjött og jafnvel sjöunda borgarfulltrúann en það gekk ekki upp,“ segir Pétur.
Hann telur líklegast að Sjálfstæðisflokkurinn myndi meirihluta með Miðflokknum..
„Það er síðan náttúrulega möguleiki, ef þetta gengur ekki upp, að það verði bankað hérna hjá mér og við förum að ræða einhvern meirihluta milli Samfylkingar og Sjálfstæðisflokks. En ég held að það sé býsna langt í það.“
Á Hornafirði er samstarf Framsóknarflokks og Sjálfstæðisflokks í sjónmáli.
Þar var Framsóknarflokkurinn hlutskarpastur í nýliðnum kosningum, með rétt tæp 45% atkvæða. Oddviti þeirra, Hjalti Þór Vignisson, segir formlegar viðræður hafnar um meirihlutasamstarf við Sjálfstæðisflokkinn.
Síðustu ár hefur Sjálfstæðisflokkurinn verið þar í meirihluta ásamt Kex-framboðinu. Kex-framboðið fékk aftur á móti ekki góða kosningu í þetta sinn og missti um helming síns fylgis og annan tveggja fulltrúa í sveitarstjórn.
„Samtalið hefur gengið prýðilega,“ segir Hjalti og bætir við að hann sé bjartsýnn á framhaldið. Þau eiga fund í dag klukkan 16 og þá verða línurnar lagðar um framhaldið.
Hjalti á ekki von á því að meirihluti verði myndaður fyrir helgina; „Við viljum vanda okkur.“
Góðan dag, Ólöf Rún Erlendsdóttir situr hér við lyklaborðið, fréttamaður á Akureyri. Ég verð límd við símann og tölvuna í dag og ætla að tryggja ykkur nýjustu tíðindi af meirihluta viðræðum á landsbyggðinni.
Endilega komið til okkar ábendingum um stöðu mála í ykkar heimabyggðum: frettir@ruv.is.
Tíðindin frá Akureyri eru þessi:
Oddvitar Sjálfstæðisflokks, L-listans og Framsóknarflokks, áttu fund um myndun meirihluta í morgun. Þau hófu viðræður strax daginn eftir kosningar og segja oddvitar það samtal ganga vel. Að öðru leyti gefur þríeykið lítið upp, annað en að viðræðum verði haldið áfram.
Sjálfstæðisflokkurinn og Framsóknarflokkurinn í Fjarðabyggð tilkynntu í gær að þeir hefðu ákveðið að hefja formlegar meirihlutaviðræður um áframhaldandi samstarf flokkanna á komandi kjörtímabili.
Meirihluti flokkanna hélt í kosningunum. Þó að hvor flokkur hafi misst einn fulltrúa geta þeir myndað meirihluta með fimm fulltrúum af níu.
Samfylkingin fékk tvö sæti og Miðflokkurinn tvö.
Hildur Björnsdóttir, oddviti Sjálfstæðisflokksins í Reykjavík, er með öll spil á hendi fyrir meirihlutaviðræður. Hún fundaði með öðrum oddvitum í gær en heldur spilunum þétt að sér.
Sjálfstæðisflokkurinn bætti við sig þremur fulltrúum í Reykjavík og er því með níu. Þrír flokkar hafa verið orðaðir við meirihluta með Sjálfstæðisflokki, Miðflokkurinn, Framsóknarflokkurinn og Viðreisn.
Sjálfstæðisflokkurinn á mesta samleið með Framsóknarflokki, samkvæmt greiningu á svörum oddvita í kosningaprófi RÚV.
Hér má sjá greiningu á málefnalegri samleið flokkanna í Reykjavík.
Einar Þorsteinsson er eini fulltrúi Framsóknar, sem missti þrjá fulltrúa, Miðflokkurinn fékk þrjá og Viðreisn bætir við sig einum og er þá með tvo.
Samfylkingin heldur sínum fimm sætum, Vinstrið fékk tvo fulltrúa og Sósíalistaflokkur Íslands missti einn.
Tveir flokkar þurrkuðust út úr borgarstjórn, Píratar og Flokkur fólksins.
Áhugaverð staða er að teiknast upp í Norðurþingi þar sem fjórir flokkar, sumir nokkuð ólíkir, funda í dag og freista þess að mynda meirihluta.
Níu fulltrúar sitja í sveitarstjórn Norðurþings og voru Sjálfstæðismenn og Framsókn í meirihluta. Hvor þeirra er með tvo fulltrúa eftir að Framsókn missti einn í nýafstöðnum kosningum. Þeir funda með oddvita Samfylkingarinnar, sem bætti við sig fulltrúa, og Óskalistans.
Oddviti Sjálfstæðisflokksins segir flokkana funda um hlutverkaskiptingu í dag. Takist það sé hún nokkuð örugg um að þeir nái saman um málefnin.
Þá yrðu aðeins fulltrúi Miðflokksins og fulltrúi Vinstri grænna í minnihluta í Norðurþingi.
Oddvitar framboða funda víða um landið og freista þess að ná saman um meirihluta í sveitarstjórnum á nýju kjörtímabili. Við ætlum að fylgjast með framvindunni og taka púlsinn á sveitarstjórnarmyndun um allt land.
Velkomin á lifandi fréttavakt þar sem við fylgjumst með vendingum í kjölfar sveitarstjórnarkosninga.
