Fjórir karlmenn voru handteknir á Akureyri vegna meiri háttar líkamsárásar um níuleytið í gærkvöld. Heimir Heiðarsson, varðstjóri hjá Lögreglunni á Norðurlandi eystra, segir þá hafa verið í annarlegu ástandi. Einn hafi átt upptökin og þrír tekist á.
Tveir mannanna fengu aðhlynningu á bráðamóttöku. Eftir rannsóknir og myndatökur voru þeir útskrifaðir af spítala í vistun lögreglu í þágu rannsóknarhagsmuna.
Þrír voru handteknir fyrir beina aðild að árásinni og einn fyrir að hlýða ekki fyrirmælum lögreglu. Þeir eru á þrítugs- og fertugsaldri.
Skýrslur voru teknar af mönnunum í dag. Lögregla fór ekki fram á gæsluvarðhald yfir þeim og þeir voru því látnir lausir. Málið er til rannsóknar.
