Sjálfstæðismenn slitu í dag formlegum viðræðum við Framsóknarflokkinn í Hafnarfirði vegna trúnaðarbrests, sólarhring eftir að þær hófust, þar sem Framsókn hafi verið í viðræðum við Samfylkingu og Viðreisn án vitneskju Sjálfstæðisflokks. Oddviti Framsóknar segir það af og frá að einhverju hafi verið lofað í því samtali og segir koma á óvart að vera sakaður um óheilindi.
Samstarfsflokkarnir Sjálfstæðisflokkur og Framsóknarflokkur voru stærstir í Hafnarfirði eftir sveitarstjórnarkosningar, báðir með þrjá bæjarfulltrúa. Flokkarnir vildu láta reyna á áframhaldandi samstarf og funduðu því stíft strax á sunnudag og áfram á mánudag. Oddviti Framsóknar er núverandi bæjarstjóri.
„Ég hafði nú lýst yfir áhuga á því að verða bæjarstjóri og ég tók það samtal við Valdimar [oddvita Framsóknar] og það endaði þannig á mánudagskvöldið eftir að ég hafði boðið upp á ýmiss konar kosti, meðal annars að fá faglegan bæjarstjóra, þá féllumst við á það að hann yrði bæjarstjóri í fjögur ár og það var handsalað,“ segir Orri Björnsson, oddviti Sjálfstæðisflokksins í Hafnarfirði.
Drengskaparheit eða heiðurssamkomulag
Valdimar Víðisson oddviti Framsóknar segir að þrátt fyrir það hafi sá fundur verið mjög krefjandi og þungur. Upplifunin hafi verið að Sjálfstæðisflokkurinn vildi hann ekki áfram í bæjarstjórastólnum. Hann hringdi því í Orra morguninn eftir og sagði samtalið ekki ná lengra að sinni. Í framhaldinu hafi hann átt það sem hann kallar óformleg samtöl við bæjarfulltrúa Samfylkingar og Viðreisnar.
Oddviti Samfylkingarinnar sagði í hádegisfréttum að hún hefði upplifað þann fund þannig að samkomulag um formlegar viðræður væri svo gott sem í höfn og að Framsókn hefði hafið formlegar viðræður við Sjálfstæðisflokk morguninn eftir, sem svik.
„Við skiljum við hann á þriðjudagskvöldi og það var bara handsalað samkomulag sem maður myndi halda að væri drengskaparheit eða heiðursmannasamkomulag, og bíðum eftir símtalinu daginn eftir,“ segir Karolína Helga Símonardóttir, oddviti Viðreisnar í Hafnarfirði.
Valdimar segir þetta ekki rétt, ekkert samkomulag hafi verið í höfn. „Það kom fram og það eru fleiri til frásagnar en ég og það voru fleiri fulltrúar Framsóknar og Viðreisnar á þeim fundi. Það var alveg skýrt að það voru óformlegar umræður á þeim fundi. Við höfum unnið saman og vel. Því kemur það mér á óvart að maður sé sakaður um svona óheilindi og að vinna ekki af heilindum.“
Að sögn Valdimars var ákveðið að hefja formlegar viðræður við Sjálfstæðisflokkinn í hádeginu í gær. Sólarhring síðar, í hádeginu í dag, sleit Sjálfstæðisflokkurinn þeim vegna fyrrnefnds trúnaðarbrests. Orri segir hafa verið viðbúið að Framsókn myndi tala við aðra, en það hafi komið á óvart hve langt það hafi gengið.
„Við erum komin í það að við treystum Framsóknarflokknum ekki lengur út af þessum trúnaðarbresti og það er það sem er við að etja,“ segir Orri og þvertekur fyrir að hafa slitið viðræðum vegna þess að hann ásælist bæjarstjórastólinn.
Brögð í tafli
Hildur Rós Guðbjargardóttir er nýr oddviti Samfylkingarinnar í Hafnarfirði. Hún sagði í hádegisfréttum að Samfylkingin hefði verið búin að ræða við Framsóknarflokkinn eftir kosningar og þær umræður gengið langt. Hún sagðist ekki hafa rætt við Framsóknarmenn nýlega, eftir að í ljós kom að þeir ræddu við tvo flokka í einu.
„Eins og er þá hugnast okkur ekki samstarf við Framsóknarflokkinn vegna, já, bara svika. Það voru brögð í tafli. Framsókn var þarna með tvo skildi á lofti. Við fréttum það eftir á, það þarf að vera traust og heiðarleiki í samskiptum svo hægt sé að vinna saman.“
Samfylkingin útilokar ekkert, sagði Hildur Rós. Hún sagði engar þreifingar hafa verið um samstarf við Sjálfstæðisflokkinn og Viðreisn en að Samfylkingin væri ábyrgt stjórnmálaafl og tilbúin að stíga upp ef þess væri óskað.
