Evrópuþingið samþykkti í dag hertar innflytjendareglur fyrir Evrópusambandið, sem gefa yfirvöldum víðtækari heimildir til að handtaka fólk og opna á stofnun móttökubúða erlendis fyrir innflytjendur sem vísað hefur verið á brott frá ESB-ríkjum.
Þrátt fyrir að aðsókn flóttafólks til ESB-landa hafi dregist saman á síðasta ári hafa mörg ríki lýst yfir vilja til að herða á lagabálkinum. Þau líta á heimild til að vísa brottvísuðum í móttökubúðir í löndum utan ESB sem gagnlega fælingu gegn aðsókn innflytjenda.
Lagasetningarferlið hefur tekið nokkuð langan tíma en þingmenn samþykktu frumvarpið með 418 atkvæðum gegn 218. Til að fullgilda lögin endanlega þurfa aðildarríkin að staðfesta þau, en þau hafa þegar samþykkt þau með fyrirvörum. Flest ákvæði laganna taka gildi um leið og þau verða afgreidd að fullu, en önnur taka gildi ári síðar.
Meðal annarra úrræða sem ríki geta gripið til þegar og ef lögin taka gildi er að þau geta leitað á útlendingum öðrum en ESB-borgurum, sem og á heimilum þeirra, og tekið persónulegar eigur fólks eignarnámi.
Skiptar skoðanir í sölum Evrópuþingsins
Þingmenn af hægri vængnum fögnuðu þegar málið var í höfn en vinstri menn gagnrýndu nýju lögin harðlega. Mannréttindasamtök hafa einnig deilt á lögin sem þau segja að ýti undir fordóma gegn fólki á flótta og ali á skautun í samfélaginu sem megi síst við því um þessar mundir.
Þá hefur mörgum ríkjum sem hafa helst verið nefnd til sögu sem móttökulönd, til að mynda Rúanda og verið legið á hálsi fyrir að virða ekki mannréttindi eigin þegna.
Meðal ríkjanna sem tala helst fyrir því að koma upp brottvísunarstöðvum í löndum utan sambandsins eru Danmörk, Austurríki, Þýskaland, Holland og Grikkland.
Kyriakos Mitsotakis, forsætisráðherra Grikklands, sagði um síðustu helgi að stefnt væri að því að opna fyrstu stöðvarnar á næsta ári.
