Eva Margrét Ásmundsdóttir, löggildur fasteignasali, hefur tekið við stjórnartaumunum hjá ESJA Legal ehf. og gegnir hún nú starfi framkvæmdastjóra lögmannsstofunnar. Hún kemur til fyrirtækisins með fjölbreytta reynslu í viðskiptum og markaðsmálum og hyggst nýta bakgrunn sinn til þess að innleiða frekari tæknilausnir í rekstri félagsins, til þess að bæta ferla, auka skilvirkni og styrkja tekjugrunninn enn frekar. Kemur þetta fram í fréttatilkynningu.
„Þær breytingar sem eru að verða á rekstri flestra fyrirtækja um þessar mundir með tilkomu gervigreindar eru á pari við þær breytingar sem urðu þegar Internetið kom fyrst til sögunnar,“ segir Eva Margrét, aðspurð um hvernig hún hyggst láta til sín taka á nýjum vettvangi. „Þeir sem eru ekki í fylkingarbrjósti þessara breytinga munu verða undir í samkeppninni. Það eru ansi mörg ónýtt tækifæri á sviðum lögfræðinnar, sem við ætlum að nýta okkur, viðskiptavinum stofunnar til heilla.“
Eva Margrét er löggiltur fasteignasali og starfaði sem slíkur um árabil. Þá hefur hún áður gegnt lykilhlutverkum í öðrum greinum og má þar nefna að hún var innkaupastjóri hjá bílaleigunni Camp Easy, þar sem hún sá um innkaup og birgðastýringu fyrir fyrirtækið, sem þá var í örum vexti og með yfir 200 bifreiðar í rekstri. Til viðbótar við stjórnunarhlutverk sitt mun Eva Margrét leiða umfangsmikla endurskipulagningu á innri ferlum stofunnar, meðal annars með að nýta forritunarhæfileika sína til þess að innleiða sjálfvirknivæðingu á lykilsviðum rekstrarins, meðal annars með liðsinni gervigreindar.
„Markmiðið er að auka skilvirkni, lækka rekstrarkostnað og breikka tekjugrunn fyrirtækisins með nýjum þjónustuþáttum sem byggja á tæknilausnum,“ segir Eva. „Þetta eru meðal annars þjónustusvið sem áður hefðu krafist mikils mannafla. Það er allt undir hvað þetta varðar og ég er með alla ferla stofunnar til skoðunar, með það fyrir augum að kortleggja hvar mestu tækifærin eru.“
ESJA Legal er í grunninn fjölskyldufyrirtæki og var fyrirtækið stofnað af eiginmanni Evu, Ómari R. Valdimarssyni hæstaréttarlögmanni árið 2009. Fyrstu árin snerist reksturinn aðallega um fjölmiðlaráðgjöf og almannatengsl, en fókusinn var færður yfir á lögfræði árið 2013 sem er í dag ær og kýr stofunnar. Þrátt fyrir að lögmannsstofan sé í grunninn örfyrirtæki er viðskiptavinahópurinn bæði stór og fjölbreyttur, en ESJA Legal hefur frá upphafi sinnt hagsmunagæslu fyrir einstaklinga, fyrirtæki og stofnanir. Stofnandi ESJA Legal, Ómar R. Valdimarsson hrl., mun halda áfram starfi sínu hjá stofunni sem hæstaréttarlögmaður og sinnir hann ráðgjöf og hagsmunagæslu bæði á sviðum stjórnsýslunnar og fyrir dómstólum.
„Þær breytingar sem eru að verða á flestum sviðum samfélagsins um þessar mundir kalla á að við fáum manneskju í brúnna sem getur helgað sig þessu alfarið,“ segir Ómar og vísar til þeirra tækniframfara sem eru að breyta samfélagsmyndinni með umfangsmeiri hætti en lengi hefur sést. „Ef maður ætlar ekki að missa af þessari lest er eins gott að gæta þess að hvert skref fram á við sé úthugsað og tekið með faglegum og skipulögðum hætti. Engin mun geta gert það betur en Eva Margrét.“ Hægt er að hafa samband við Evu Margréti í síma 822-8196 eða með því að senda henni tölvupóst á netfangið eva@esl.is.
ESJA Legal ehf. er lögmannsstofa með starfsstöð að Hlíðarfæti 15, 102 Reykjavík. Stofan sinnir fjölbreyttum verkefnum á öllum sviðum lögfræðinnar, s.s. fyrirtækja- og félagarétti, sakamálum, skaðabótarétti og stjórnsýslurétti. Nánari upplýsingar eru á www.esl.is.
