Helen Hafgnýr Cova, rithöfundur og útgefandi, kom hingað til lands frá Venesúela árið 2016. Hún segir að erfitt hafi verið að ná í ættingja og vini þar eftir að jarðskjálftar gengu yfir landið í síðustu viku.
„Það var daginn sem þetta gerist eða kvöldið sem þetta gerist. Það bara datt allt út, allt rafmagnið og símalínur og allt það. Þá vorum við öll að reyna að ná í fjölskyldu og vini sem var hræðilegt,“ segir hún.
Rafmagn sé þó komið aftur á í meirihluta landsins og hún hafi náð í allt sitt fólk.
„Sem betur fer eru allir bara í heilu lagi, það er bara fínt,“ segir Helen. Þrátt fyrir það hafi mörg af hennar skyldmennum orðið fyrir efnislegu tapi þar sem hús hafi skemmst.
„En þetta er því miður ekki svoleiðis hjá öllum og það er bara fullt af fólki sem er látið eða ennþá týnt,“ segir hún. Staðfest dauðsföll eru að minnsta kosti 1450 en óttast er að mun fleiri séu látin því hátt í 50 þúsunda er enn saknað.
Flest af skyldmennum Helen búa í borgunum Caracas og Valencia og segir hún jarðskjálftana enn hafa áhrif.
„Pabbi minn er mjög hræddur og fólk er bara ennþá hrætt,“ segir Helen sem tekur fram að pabbi hennar hafi skolfið í tvo daga eftir að jarðskjálftarnir áttu sér stað.
„Hann er líka fatlaður og þurfti að hlaupa niður og úr blokkinni,“ segir Helen. Engu að síður hafi orðið litlar skemmdir á húsi föður hennar. Ekki sé sömu sögu að segja um aðrar byggingar í borginni. „Hann er búinn að keyra aðeins um Caracas og það er bara allt í klessu,“ segir hún.
Vill hjálpa með útgáfu bókar
Helen segir að hún finni til mikils hjálparleysis þar sem hún geti lítið gert en hún ákvað sem útgefandi að gefa allan ágóða af sölu bókarinnar Mamma mjöll og minningar hennar til fórnarlamba jarðskjálftanna. Það er fyrsta skáldsagan sem kemur út í íslenskri þýðingu frá Venesúela. Kristín Guðrún Jónsdóttir þýddi bókina og er hún til sölu í flestum bókabúðum.
„Manni líður svo hjálparvana, mig langar að gera,“ segir Helen sem athugaði hvort Rauði krossinn væri að senda fólk til Venesúela.
Helen segir að með útgáfunni vilji hún einblína sérstaklega á munaðarlaus börn í Venesúela. „Það eru 3,9 milljónir barna á þessu svæði sem eru búin að missa foreldra eða fjölskyldu,“ segir Helen. Það sé ekki einungis vegna skjálftanna heldur hafi margir yfirgefið landið á síðustu árum vegna efnahagsástandsins.
„Ef þið viljið kynnast betur menningu í Venesúela og á sama tíma styðja fólk þar er þetta góð leið til þess,“ segir Helen sem hvetur fólk þó einnig til að gefa peninga beint til hjálparsamtaka líkt og Rauða krossins og Unicef.
Erfitt að ímynda sér eyðilegginguna
Helen fór síðast til Venesúela árin 2023 og 2024, stuttu fyrir kosningar í landinu. Hún segir jarðskjálftana koma á erfiðum tíma í sögu landsins.
Þetta er bara mjög erfitt af því að okkur fannst einhvern veginn að Venesúela væri að byrja að fara úr þessum erfiðleikum sem eru búnir að vera í langan tíma, segir Helen
„Það er fullt af fólki þarna sem er yndislegt og á skilið bara gott líf. Þetta er mjög fallegt land og fullt af frábæru fólki og það er bara mjög sorglegt að ímynda sér að við höfum bara verið þar bara fyrir tveimur árum og núna eru allt í einu bara Caracas og La Guaira næstum farin.
