Áfrýjunardómstóll í Frakklandi staðfesti í dag dóm yfir Marine Le Pen, stofnanda Þjóðfylkingarinnar. Óvíst er hvort hún býður sig fram til forseta á næsta ári.
Pólitísk örlög Marine Le Pen, leiðtoga frönsku Þjóðfylkingarinnar, eru enn óljós. Áfrýjunardómstóll í París staðfesti í hádeginu sakfellingu lægri dómstóls yfir henni.
Til upprifjunar var Le Pen á síðasta ári, ásamt fleiri leiðtogum Þjóðfylkingarinnar, sakfelld fyrir að misnota styrki frá Evrópuþinginu til að fjármagna starf flokksins í Frakklandi.
Með dómnum var Le Pen bannað að bjóða sig fram til opinbers embættis í fimm ár. Auk þessa var hún dæmd til fjögurra ára fangelsisvistar, skilorðsbundinnar til tveggja ára, og gert að greiða háa sekt.
Dæmd í eins árs stofufangelsi
Dómari áfrýjunardómstólsins staðfesti dóminn, sektaði hana um hundrað þúsund evrur og dæmdi hana til þriggja ára fangelsisvistar sem hún afplánar í stofufangelsi með ökklaband í eitt ár.
Dómstóllinn stytti framboðsbannið sem gerir það að verkum að Le Pen ætti að geta boðið sig fram í forsetakosningum á næsta ári þar sem hún hefur þótt sigurstrangleg. Hún hefur hins vegar lýst því yfir að hún myndi ekki bjóða sig fram ef hún væri með ökklaband. Nú reynir á hvort hún standi við þau orð.
Le Pen hefur þvertekið fyrir að hafa brotið af sér. Hún hefur tvisvar áður boðið sig fram til forseta, 2017 og 2022. Í bæði tapaði hún fyrir Emmanuel Macron, sem gegnt hefur embætti forseta undanfarin tvö kjörtímabil. Samkvæmt stjórnarskrá getur Macron ekki boðið sig fram í þriðja sinn og lýkur embættistíð hans því á næsta ári.
Ef svo fer að Le Pen ákveði að bjóða sig ekki fram þykir líklegast að formaður Þjóðfylkingarinnar, Jordan Bardella, verði frambjóðandi flokksins. Von er á yfirlýsingu frá Le Pen vegna niðurstöðunnar síðar í dag eða í kvöld.
