Framleiðsla hefur hafist að nýju í annarri af tveimur kerlínum álvers Norðuráls á Grundartanga. Framleiðsla í henni var stöðvuð í október eftir óvænta bilun í rafspennum. Bilunin olli því að álframleiðsla á Grundartanga dróst saman um tvo þriðju hluta.
„Vel hefur gengið að endurræsa fyrstu kerin, í kerlínu 2 í vikunni, en stefnt er á að álverið verði komið í fulla framleiðslu á ný í lok júlímánaðar,“ segir í tilkynningu frá Norðuráli.
Þar segir að eftir bilunina hafi verið ákveðið að fækka ekki í starfsmannahópi fyrirtækisins. „Ljóst er að fyrirtækið væri ekki jafnvel í stakk búið til að hefja framleiðslu og raun ber vitni ef ekki væri fyrir það einvala lið sem hjá Norðuráli starfar.“
Bilunin haft víðtæk áhrif
Í febrúar sagði Gunnar Guðlaugsson forstjóri Norðuráls að endurræsa þurfi 340 ker. Að meðaltali verði tvö til fjögur ker gangsett á dag.
Áhrifin af biluninni hafa verið víðtæk. Hún var mikið áfall fyrir ativnnulíf á Vesturlandi og talin geta dregið úr hagvexti á Íslandi um hátt í eitt prósent ef ekki tækist að koma framleiðslunni í gang fyrr en undir lok árs. Bilunin hefur einnig valdið tekjumissi fyrir Eimskip og Orkuveituna en Norðurál er einni stærsti viðskiptavinur félaganna tveggja.
