Íris Helga Jónatansdóttir segist ekki hafa hvatt mann til þess að ata skít á heimili eins mannanna sem sakað hafa hana um umsáturseinelti. Hún er ásökuð um að hafa beitt mennina umfangsmiklu umsáturseinelti á árunum 2022 til 2025.
Aðalmeðferð í máli hennar hófst í dag og stendur fram í næstu viku.
Krafa gerð um frávísun
Einn maður er meðákærður í málinu og er honum gefið að sök að hafa aðstoðað Írisi Helgu í umsáturseinelti sínu. Fram kom í málinu í dag að hann er sakaður um að hafa farið að heimili fyrrum sambýlismanns Írisar Helgu og að hafa þar makað skít á heimili hans og sambýliskonu hans.
Verjandi mannsins gerði kröfu um að máli hans yrði vísað frá dómi þar sem óljóst væri hvort allir ákæruliðir málsins tengdust hans hlutdeild í málinu. Dómari hefur ekki tekið afstöðu til þess.
Íris lýsti því yfir að maðurinn væri eini vinur hennar sem ekki hefði snúið við henni baki í gegnum málaferli síðustu ára. Þau hefðu kynnst í gegnum vinnu en hefðu einnig þekkst sem börn.
„Skítaverkefni lokið“
Lesin voru upp skilaboð á milli mannsins og Írisar Helgu sem sögðu að þrátt fyrir að talað hefði verið um að maka skít á heimili mannsins hefði hún aldrei hvatt manninn beinlínis til þess að fremja verknaðinn.
Í samskiptum á milli þeirra sem lesin voru upp segir maðurinn „skítaverkefni lokið“ og við því svarar Íris Helga: „Omg, sá enginn til þín?“ Og einnig: „Ert svo mikill snillingur!“
Í frekari samskiptum á milli Írisar og mannsins segir hún: „Viðbjóðurinn á afmæli á morgun, hvað eigum við að gefa honum í afmælisgjöf? Ég er í svo miklum hefndarhug að ég á erfitt með mig.“
Og einnig:
„Þyrfti no djoke að fá annan svona verknað sem sést í mynd,“ sagði Íris Helga sem sagðist ekki geta svarað hvar hún var að hugsa um á þessum tíma. Í framhaldi af þessu sendi Íris Helga: „Ætlar þú að fara í heimsókn til þeirra? Löggan sér ekki samskiptin okkar.“
Verjandi mannsins mótmælti því að skilaboðin væru lesin upp í viðurvist fjölmiðla þar sem enn væri ekki á hreinu fyrir hvað maðurinn væri kærður samkvæmt ákæru.
Fyrri hluta dags var aðallega farið yfir brot sem tengdust manni sem Íris bjó áður með en sambandi þeirra lauk 2021. Seinni part dagsins var farið yfir þá ákæruliði sem snúa að brotum gegn hinum tveimur mönnunum og dóttur eins þeirra ásamt öðrum fjölskyldumeðlimum.
Gagnrýnin á rannsóknina og gögn málsins
Íris Helga hefur verið mjög gagnrýnin á bæði rannsókn lögreglu á málinu og þau gögn sem lögð hafa verið fyrir hana. Fát kom í eitt skipti á Írisi Helgu þegar borið var undir hana skjáskot sem tekið var af tölvu hennar. Þar má sjá á flipa í tölvu hennar að einn er merktur andreap23@tutamail.com.
Sá aðgangur er sagður hafa verið notaður meðal annars til þess að senda skilaboð um að dóttir eins mannanna væri að áreita drengi í skólanum sínum, að mikil drykkja og ólifnaður væri á heimili hennar og að maðurinn og kona hans væru sek um að reyna að flytja inn fíkniefni í skólann. „Ég treysti ykkar gögnum ekki,“ sagði Íris Helga við þessu.
Íris Helga er einnig sökuð um að hafa búið til marga mismunandi falska aðganga til þess að dreifa upplýsingum um mennina þrjá. Til dæmis er henni gefið að sök að hafa búið til aðganginn Barnaperri Breiðdalsvíkur á Tik Tok þar sem aðdróttunum um að einn mannanna væri barnaperri var dreift. Íris Helga hefur þó ítrekað sagt að hún noti ekki Tik Tok og kunni ekki á forritið.
Fram kom að þegar sími Írisar var haldlagður hefðu reikningar á Tik Tok hins vegar fundist, þar á meðal þessi aðgangur og sagðist Íris Helga ekki geta útskýrt það. Hún hefur ítrekað gefið í skyn að aðrir hafi haft aðgang að bæði síma hennar og tölvu á þeim tíma sem brotin eiga að hafa farið fram.
