Þegar Iðunn var opnuð með pompi og prakt í desember 2024 voru sex veitingastaðir í mathöllinni. Nú, 16 mánuðum síðar, eru þeir aðeins tveir. Rekstrarörðugleikar hafa verið töluverðir að sögn fyrrverandi rekstraraðila.
Akureyringar spenntir fyrir mathöll
Það voru stórar fréttir fyrir Akureyringa þegar opna átti fyrstu mathöllina og það á Glerártorgi. Eik fasteignarfélag, sem á Glerártorg, stóð fyrir breytingum á stóru rými þar sem áður hafði verið lítið kaffihús og veitingastaður. Þeir gerðu samning við Guðmund Pétursson og Aron Lárusson um rekstur mathallarinnar sem þeir nefndu Iðunni.
Sex veitingastaðir stóðu gestum opnir þann 21. desember 2024 en fljótlega fór að halla undan fæti.
Fyrstu tveir staðirnir til að leggja upp laupana voru franski bistro-staðurinn La Cusine og Fuego Taqueria, sem bauð upp á mexíkanskan mat. Strýtan, sem var kaffihús og bar, hætti einnig rekstri fljótlega en opnaði sem veitingastaður skömmu síðar. Retro Chicken hætti um áramót og nú nýverið lét sushi-staðurinn OSHI gott heita. Í millitíðinni opnaði staðurinn Wok to Walk.
Eftir standa Pizza Populare, sem er í eigu sömu eigenda og stóðu að rekstri Iðunnar og nýi staðurinn Wok to Walk.
Of mikill rekstrarkostnaður
Þeir Guðmundur og Aron eru hættir rekstri Iðunnar og Eik hefur tekið yfir. Fjögur veitingabil standa auð og tómlegt er um að litast í mathöllinni.
Að mati nokkurra fyrrum rekstraraðila á Iðunni var mikill upphafskostnaður við mathöllina og sameiginlegur rekstrarkostnaður, svo sem þrif, það sem varð þeim að falli. Það hafi einfaldlega verið of lítið að gera miðað við rekstrarkostnaðinn.
„Ekkert óeðlilegt við að veitingastaðir loki og aðrir opni“
Í skriflegu svari Eikar fasteignarfélags til fréttastofu segir að það séu ýmsar skýringar fyrir breytingum á Iðunni mathöll, sem „eiga sér allar rætur í undirliggjandi rekstri viðkomandi staða“.
Þá segir einnig: „Eik fasteignafélag tók yfir rekstur mathallarinnar nú í lok mars 2026, en reksturinn var áður á höndum þriðja aðila. Því miður reyndust ekki forsendur til að halda því rekstrarmódeli áfram. Það er í sjálfu sér ekkert óeðlilegt við það að veitingastaðir loki og aðrir opni – þannig hefur verið þróunin verið á Íslandi að undanförnu og í raun um allan heim í þessum geira. Mathallir og veitingastaðir í verslunarmiðstöðvum hafa þar ekki verið undanskildir.“
