Stjórnvöld í Afríkuríkinu Chad hyggjast segja sig úr Alþjóðasakamáladómstólnum (e. International Criminal Court). Með úrsögninni bætist Chad í hóp þriggja annarra Afríkuríkja sem sagt hafa dómstólinn ósanngjarnan.
Stjórnvöld í Chad segja ákvörðunina byggða á ítarlegri úttekt á starfsemi dómstólsins frá því hann tók til starfa 2002. Niðurstaðan sé sú að árangur hans hafi verið takmarkaður og starfsemi hans að miklu leyti beinst að Afríkuríkjum.
Af þrettán rannsóknum sem dómstóllinn hefur hafið tengjast níu þeirra Afríkuríkjum, segir í tilkynningu stjórnvalda. Þá séu sjö einstaklingar í haldi dómstólsins og sex þeirra vegna mála sem tengjast Afríku.
Feta í fótspor þriggja annarra Afríkuríkja
Með úrsögninni bætist Chad í hóp þriggja annarra Afríkuríkja – Búrkína Fasó, Malí og Níger – sem tilkynnt hafa úrsögn sína. Herforingjastjórnirnar í ríkjunum hafa sagt dómstólinn verkfæri notað til nýlendukúgunar.
Yfirvöld í Venesúela hafa einnig sagt sig úr dómstólnum. Þau saka hann um hlutdrægni en hann rannsakar meinta glæpi gegn mannkyni sem framdir voru undir stjórn Nicolás Maduro.
Bandarísk stjórnvöld hvöttu Chad til að endurskoða aðild sína að Alþjóðasakamáladómstólnum.
Óljóst hvort úrsögnin tengist beiðni Bandaríkjanna
Bandaríkin eru ekki meðal aðildarríkja en ríkisstjórn Donald Trump hefur ítrekað lýst yfir andstöðu sinni gagnvart dómstólnum. Þá hefur Marco Rubio utanríkisráðherra Bandaríkjanna sakað hann um að heyja stríð gegn Bandaríkjunum.
Í fyrri yfirlýsingu utanríkisráðuneytis Chad var ákvörðunin tengd beiðni Bandaríkjanna. Abdoulaye Sabre Fadoul utanríkisráðherra Chad hafnar því hins vegar að ákvörðunin hafi verið tekin að beiðni Bandaríkjamanna.
Framkvæmdastjórn Alþjóðasakamáladómstólsins segir úrsagnir ríkjanna áhyggjuefni. Þær veiki alþjóðlegt réttarkerfi og auki hættuna á að þeir sem fremji alvarlegustu glæpina komist undan refsingu.
