Bresku grínistarnir Daz Black og Will McDaniel fengu á dögunum risastóran kassa fullan af íslensku nammi og snakki. Kassann sendi Sigríður Helga, 19 ára aðdáandi úr Reykjavík, en vinur hennar Símon hjálpaði henni að pakka honum.
Meðal þess sem félagarnir smakka í myndbandinu eru Rískubbar, Hraun, Eitt sett, Þristur, Trítlar, Ostapopp, súkkulaðirúsínur og saltstangir – svo eitthvað sé nefnt. Einnig fengu þeir íslenskan harðfisk, sem þeir reyndu að borða með smjöri.
Þeir voru sérstaklega hrifnir af Rís kubbum, Hrauni og súkkulaðirúsínunum. Íslenski lakkrísinn fékk hins vegar mun kaldari móttökur, þótt þeir héldu áfram að smakka hann aftur og aftur. Þristur inniheldur súkkulaði, karamellu og lakkrísbita, en Eitt sett sameinar mjólkursúkkulaði og lakkrís — blanda sem reyndist félögunum framandi.
Harðfiskurinn vakti þó sterkustu viðbrögðin og líktu þeir áferð hans meðal annars við harða húð af fæti. Smjörið dugði lítið til að breyta skoðun þeirra.
