Norðmenn ættu að halda þjóðaratkvæðagreiðslu á næsta ári um hvort hefja eigi umsóknarferli um aðild að Evrópusambandinu, segir Kjell Magne Bondevik, fyrrverandi forsætisráðherra Noregs.
Bondevik ræddi þetta í viðtali við Nettavisen sem birtist í gær. Þar segir hann að staða heimsmálanna hafi breyst með slíkum hætti að hann hafi endurskoðað afstöðu sína til aðildar Noregs að Evrópusambandinu.
Bondevik beitti sér gegn aðild Noregs að sambandinu í þjóðaratkvæðagreiðslum 1972 og 1994.
Stjórnvöld vinni hratt í breyttum heimi
„Ég tel að ríkisstjórnin eigi að vinna hratt og að við eigum þjóðin eigi að greiða atkvæði um það á næsta ári hvort hefja eigi umsóknarferli,“ segir hann í viðtalinu.
Bondevik vísar meðal annars til þess að Rússar séu orðnir herskárri en þeir hafi verið síðustu áratugi, að áhrif og völd Kína fari vaxandi og að Bandaríkin séu að verða þjóðernissinnaðri en áður.
Norðmenn verða að taka mið af þessu og gætu styrkt Evrópu með aðild, segir Bondevik. Hann lýsir einnig áhyggjum af því að Noregur gæti orðið eina norræna ríkið utan Evrópusambandsins ef Ísland gengi í sambandið. Þannig gæti Noregur orðið út undan.
Frá 60% á móti yfir í 60% með
Bondevik segir að afstaða hans hafi snúist frá því þegar Norðmenn sömdu um aðild 1994. Þá hafi hann verið 60-70 prósent á móti og 30-40 prósent fylgjandi. Nú sé hann 60-70 prósent fylgjandi.
Hann segir að enn sé hægt að færa rök gegn aðild en telur að ekki eigi öll rökin enn við sem ollu andstöðu hans við aðild fyrir rúmlega þremur áratugum. Þau neikvæðu áhrif sem hann óttaðist að aðild hefði hefðu ekki raungerst, svo sem í loftslagsstefnu.
Lokaákvörðun í þjóðaratkvæðagreiðslu
Ákvörðunin ætti að vera í höndum þjóðarinnar segir Bondevik. „Við eigum að halda þjóðaratkvæðagreiðslu um hvort við eigum að hefja viðræður við Evrópusambandið. Ef svarið er nei við því þá er málið úr sögunni.“
Segi meirihlutinn já eigi að halda aðra þjóðaratkvæðagreiðslu að loknum viðræðum við ESB um hvort Noregur gangi í sambandið eða ekki.
